Tags-Ghar

nīlāmī meñ bech rahe ho rishtoñ ko
ghar kī zīnat thiiñ tasvīreñ paḌh lenā

ghar se bāhar niklo kisī din
itnā bhī kyā rahnā tanhā

ehsās kī ḳhushbū kahāñ āvāz ke jugnū kahāñ
ḳhāmosh yādoñ ke sivā ghar meñ rahā kuchh bhī nahīñ

vahī shahr hai vahī rāste vahī ghar hai aur vahī lawn bhī
magar is darīche se pūchhnā vo daraḳht anaar kā kyā huā

kis kī talāsh hai hameñ kis ke asar meñ haiñ
jab se chale haiñ ghar se musalsal safar meñ haiñ

aisī to koī ḳhaas ḳhatā bhī nahīñ huī
haañ ye samajh liyā thā ki ham apne ghar meñ haiñ

shīshe kī parī tujh meñ kyā husn kā aalam hai
saaqī na ho phir bhī to ye ghar hai parī-ḳhāna

de koī sakhī daatā mai-ḳhāna baḌā ghar hai
aatā hai sadā detā shab ko koī mastāna

yuuñ ghar se mohabbat ke kyā bhaag chale jaanā
kuchh is meñ samajhtā hai de aag chale jaanā

kūche se tire gaahe ghar shab ko jo aatā huuñ
phir sub.h hue sote uTh jaag chale jaanā

din bhar kā hañgāma saarā shaam Dhale phir bistar pyārā
merā rasta ho yā terā har rasta ghar jaane ko hai

khetoñ ke beach phuul ke bistar ke ās-pās
mausam to aa ke baiTh mire ghar ke ās-pās

chal nikalne se bahut Dartā huuñ
kaun phir lauT ke ghar jā.egā

kaisī havā chalī ki ma.an bārishoñ ke ba.ad
har be-gulāb rut ne gulistāñ meñ ghar kiyā

saare sutūn ret kī buniyād par uThā.e
ham ne kis ehtiyāt se ta.amīr ghar kiyā

har aane vaale pal se Dar rahā huuñ
kin andeshoñ meñ ghir kar rah gayā huuñ

khaḌī ho maut darvāze pe jaise
maiñ ghar meñ huuñ magar sahmā huā huuñ

apnā ghar ban gayā maqtal magar ham ahl-e-yaqīñ
nahīñ karte haiñ ġham-e-hosh-rubā se tauba

mujh ko apnā patā-Thikāna mile
vo bhī ik baar mere ghar aa.e

yaar tanhā ghar meñ hai afsos lekin ham nahīñ
huur to hai gulshan-e-firdaus meñ aadam nahīñ