Tags-Ghar

guzrī jo rahguzar meñ use darguzar kiyā
aur phir ye tazkira kabhī jā kar na ghar kiyā

vo shaḳhs jo kisī masjid meñ jā nahīñ saktā
to apne ghar meñ hī kuchh roz etakāf kare

ghar banāyā to thā bulandī par
phir bhī āñgan meñ bhar gayā paanī

qāsid-e-āshiq-e-saudā-zada kyā laa.e javāb
jab na mālūm ho ghar aur na patā yaad rahe

kab tū sotā thā ghar mare aa kar
jaage taalā ġharīb-ḳhāne ke

jis par girī hai barq bhī jis pe havā kī hai nazar
shāḳhoñ meñ aisī ai 'sahāb' ghar bhī koī banā.e kyuuñ

galī meñ koī ghar achchhā nahīñ thā
magar kuchh khiḌkiyāñ achchhī lagī haiñ

kuredte raho vīrān bastiyoñ kī ye raakh
yahīñ kahīñ pe mirā ghar zarūr niklegā

log gītoñ kā nagar yaad aayā
aaj pardes meñ ghar yaad aayā

kyā se kyā ho ga.ī is daur meñ hālat ghar kī
dasht pur-nūr hue baḌh ga.ī zulmat ghar kī

ab na darvāze kī raunaq na vo āñgan kā hujūm
kis qadar baar hai āñkhoñ pe ziyārat ghar kī

sab kī dahlīz pe jalte haiñ ta.assub ke charāġh
kyā karegā koī aise meñ hifāzat ghar kī

ḳhāmushī farzī rivāyāt ināyat īsār
inheñ buniyādoñ pe mauqūf hai azmat ghar kī

jin ke hisse meñ koī sāya-e-dīvār nahīñ
vo bhī insāñ haiñ unheñ bhī hai zarūrat ghar kī

laakh qismat meñ ġharīb-ul-vatanī ho 'rahbar'
khīñch laa.ī hai magar phir bhī mohabbat ghar kī

ḳhalā meñ girvī rakkhā apne saare ḳhvāboñ ko
aur is zamīn pe chhoTā sā ghar liyā maiñ ne

tamām umr safar kā samar milegā mujhe
pas-e-ufuq hī kahīñ ab to ghar milegā mujhe

milā na jis ke liye ghar kā narm garm sukūn
yahīñ kahīñ vo sar-e-rahguzar milegā mujhe

mujhe ḳhabar ho jo apnī to tum ko likh bhejūñ
abhī to DhūñD rahā huuñ vo ghar jo merā thā

mirā ye malba mirā ḳharāba tumhārī yādoñ se laḌ rahā hai
usī kī ta.amīr ho rahī hai vo ek ghar jo nahīñ bachā hai