Tags-Ghar

paḌe hue haiñ jalī-bujhī cigaretoñ ke TukḌe har ik jagah par
aur ek chehra shagufta chehra tamām ghar meñ basā huā hai

jo rañg-roġhan bikhar rahe haiñ tamām ghar meñ atā hai us kī
bas ek aamad se us kī vīrāñ khañDar sā ye ghar bhī jī uThā hai

qadmoñ meñ jab se mere haiñ taare dhare hue
saare adū haiñ ghar meñ bichāre dhare hue

āñkhoñ kī chamak mauhūm huī lau dete badan afsurda hue
dar aa.ī hai 'qaisar' ghar meñ mire ye kaisī rutoñ kī sard havā

yā ghar se qadam merā bāhar na nikaltā thā
yā shahr kī galiyoñ meñ rusvā.ī hai aur maiñ huuñ

na.e jahāñ kī tamannā meñ ghar se niklā huuñ
hatheliyoñ pe na.ī mish.aleñ jalā.e hue

azaab ye bhī kisī aur par nahīñ aayā
ki ek umr chale aur ghar nahīñ aayā

ghir gayā hai ab to sho.aloñ meñ mirā saarā vajūd
us kī yādeñ thiiñ to sar par ik ḳhunuk saayā sā thā

ham ne samjhe the ki ye hogā ma.āl-e-kār-e-ishq
ruḳh kiyā bād-e-bahārī ne mire ghar kī taraf

merī manzil pukārtī thī mujhe
lauT kar vo bhī ghar gayā shāyad

badal ke ḳhud hī hamīñ rah ga.e zamāne meñ
chale the ghar se ki duniyā badal ke dekhte haiñ

sab log shaam hote hī jab apne ghar ga.e
sahrā ko ham bhī shahr se phir lauT kar ga.e

kyā haram kyā dair haiñ jhagḌoñ ke ghar
un se 'shañkar' duur hī insāñ rahe

faqat ik bhuul ne maañ baap ko alqat kiyā ghar meñ
ki beTe jab siyāne huuñ kamānā chhoḌ dete haiñ

apne hī ghar kī ḳhair manā.ī tamām umr
ham se 'surūr' fikr-e-do-ālam na ho sakī

yādoñ ke phuul ghar se uThā kar chale to ho
dekho inheñ kisī jagah rakh kar na bhūlnā

maañ ne likhā hai ḳhat meñ jahāñ jaao ḳhush raho
mujh ko bhale na yaad karo ghar na bhūlnā

pahle to tum aag lagā kar sab kuchh jaltā chhoḌ ga.e
dīvāreñ tārīk huī haiñ ab is ghar meñ aao to kyā

mirī ḳhvāhish kā koī ghar ḳhudā ma.alūm kab hogā
abhī to zehn ke parde pe bas naqsha banātā huuñ

chamak zar kī use āḳhir makān-e-ḳhāk meñ laa.ī
banāyā saañp ne jismoñ meñ ghar āhista āhista