Tags-Ghar

har ghar meñ koī tah-ḳhāna hotā hai
tah-ḳhāne meñ ik afsāna hotā hai

jab se jaanā band merā ho gayā ai hamdamo
tab se un ke ghar meñ har har tarah ke aate haiñ log

jab vo ghabrāte the mujh se tab the un ke ghar ke ḳhush
ab jo vo ḳhush haiñ to un ke ghar ke ghabrāte haiñ log

ham ne Thokar bhī agar khaa.ī to ghar aa kar hī
apnī dahlīz hī se jā ke lagā sar apnā

apnā to tūl-e-umr se ghabrā gayā hai jī
ghar pahuñcheñ ham tamām bhī ho ye safar kahīñ

chhoḌ kar ghar ko kahīñ jaane se ghar meñ rahne kī ibādat thī baḌī
jhuuT mash.hūr huā raajā kā sach kī sansār meñ shohrat na huī

suut haiñ ghar ke har kone meñ
makḌī puurī bun kar niklī

jab bhī chor mire ghar aa.e
ek hañsī hī zevar niklī

nazar to aate haiñ kamroñ meñ chalte-phirte magar
ye ghar ke log na jaane kahāñ ga.e hue haiñ

ghar kī vahshat se laraztā huuñ magar jaane kyuuñ
shaam hotī hai to ghar jaane ko jī chāhtā hai

banā rahā huuñ abhī ghar ko ā.ina-ḳhāna
phir apne haath meñ patthar bhī dekhnā hai mujhe

be-his-o-hairāñ jo huuñ ghar meñ paḌā is ke evaz
kaash maiñ naqsh-e-qadam hotā kisī kī raah kā

jab ajal jhāñktī phirī ghar ghar
kaun zinda makān se niklā

ghar hai na kahīñ nishāñ lahad kā
miTTī hai ḳharāb be-kasī kī

phuul ḳhushbū rañg jugnū raushnī ke vāste
ghar kī dīvāroñ meñ ik rauzan banānā chāhiye

shaam ko vāpas palaTte tā.eroñ ko dekh kar
sochtī huuñ lauT kar ab ghar bhī jaanā chāhiye

chiin o arab hamārā hindostāñ hamārā
rahne ko ghar nahīñ hai saarā jahāñ hamārā

ham aaseb ke Dar se ghar kyuuñ badal leñ
parindoñ pe jachtā hai shāḳheñ badalnā

be-talab ek qadam ghar se na bāhar jā.ūñ
varna maiñ phāñd ke hī saat samundar jā.ūñ

thak ke patthar kī tarah baiThā huuñ raste meñ 'zafar'
jaane kab uTh sakūñ kyā jāniye kab ghar jā.ūñ