Tags-Ghar

ham na kahte the ki ghar jāoge
kis jagah pahuñche ho āḳhir dekho

kitnī ḳhush-hāl hai saarī duniyā
kitnā vīrān hai ye ghar dekho

maiñ jaag jaag ke kis kis kā intizār karūñ
jo log ghar nahīñ pahuñche vo mar ga.e hoñge

kaaba o quds meñ ghar kiyā ye bhī
ik adā hai mire harjā.ī kī

rañg-o-bū kā shauq āshob-e-havā meñ le gayā
titliyāñ ghar se nikal kar ibtilā meñ kho ga.iiñ

dasht nahīñ hai ye to merā ghar hai lekin jaane kyuuñ
uljhā.e rahtī hai ik vahshat sī sub.h-o-shām mujhe

ghar meñ da.avā na husn kā kar
yūsuf se nikal ke sāmnā kar

sone ke dil miTTī ke ghar pīchhe chhoḌ aa.e haiñ
vo galiyāñ vo shahr ke manzar pīchhe chhoḌ aa.e haiñ

jab bhī 'tūr' use DhūñDne ko gahre banoñ meñ jaatā huuñ
ik āvāz ye kahtī hai mujh se mūrakh ghar ko vāpas jā

masjid ke zer-e-sāya ik ghar banā liyā hai
ye banda-e-kamīna ham-sāya-e-ḳhudā hai

thake hue ghar lauT rahe haiñ saath liye āhār
chehra chehra dhuul pasīna dāman dāman dhuup

dil se agar kabhī tirā armān jā.egā
ghar ko lagā ke aag ye mehmān jā.egā

aurteñ kaam pe niklī thiiñ badan ghar rakh kar
jism ḳhālī jo nazar aa.e to mard aa baiThe

ghar humakne lage log basne lage
rañg lau de uThe phuul hañsne lage

haath hamāre sab se ūñche hāthoñ hī se gila bhī hai
ghar aise ko sauñp diyā jo aag bhī hai aur havā bhī hai

tanhā.ī kā tumhārī thā mumkin yahī ilaaj
ghar ke har ek kone ko chīzoñ se bhar diyā

dil mirā ḳhvāb-gāh-e-dilbar hai
bas yahī ek sone kā ghar hai

aaj tak apnī jagah dil meñ nahīñ apne huī
yaar ke dil meñ bhalā pūchho to ghar kyūñ-kar kareñ

Thahar jāved ke armāñ dil-e-muztar nikalte haiñ
khaḌe haiñ muntazir ham ghar se vo bāhar nikalte haiñ

nahīñ ma.alūm muñh se dil jigar kyūñkar nikalte haiñ
ham un se pūchh leñge chhoḌ ke jo ghar nikalte haiñ