Tags-Ghar

ka.ī dinoñ se baat nahīñ kī apnoñ se
aaj zarūrī ḳhat apne ghar likhnā hai

mulk to mulk gharoñ par bhī hai qabza us kā
ab to ghar bhī nahīñ chalte haiñ siyāsat ke baġhair

sho.ala-afshāñ agar aisī hī rahī aah to 'mīr'
ghar ko ham apne kaso raat jalā baiTheñge

vo koī aur ghar the jin meñ tayyab rizq pahuñche
hameñ to bas qatāroñ meñ khaḌā rakkhā gayā

mujh se ik baar zarā mil aise
maiñ tire ghar kā pata ho jā.ūñ

in ujḌī bastiyoñ kā koī to nishāñ rahe
chūlhe jaleñ ki ghar hī jaleñ par dhuāñ rahe

pyaar gayā to kaise milte rañg se rañg aur ḳhvāb se ḳhvāb
ek mukammal ghar ke andar har tasvīr adhūrī thī

aur dasht mere saath rahe bahtā megh meñ
bārish meñ apne vāste ik ghar luuñ aur gā.ūñ

dayār-e-ġhair meñ rahtā huuñ maiñ magar 'ālam'
har ek lamha mirā ghar bulā rahā hai mujhe

'shād' itnī baḌh ga.ī haiñ mere dil kī vahshateñ
ab junūñ meñ dasht aur ghar ek jaise ho ga.e

kiran to ghar ke andar aa ga.ī thī
sunahrī dhuup kyuuñ kajlā ga.ī thī

sahmā sahmā har ik chehra manzar manzar ḳhuun meñ tar
shahr se jañgal hī achchhā hai chal chiḌiyā tū apne ghar

tum to ḳhat meñ likh detī ho ghar meñ jī ghabrātā hai
tum kyā jaano kyā hotā hai haal hamārā sarhad par

jis kī bāteñ ammāñ abbū aksar karte rahte haiñ
sarhad paar na jaane kaisā vo hogā purkhoñ kā ghar

vīrāñ hai merā ghar bhī usī tarah dosto
college meñ jis tarah koī urdu class hai

be-vaqt agar jā.ūñgā sab chauñk paḌeñge
ik umr huī din meñ kabhī ghar nahīñ dekhā

yahāñ kuchh sūfiyoñ kā ghar thā pahle
vo un ke āstāne kyā hue sab

ab na vo shāḳh hai na patthar hai
kab se jañgal meñ koī be-ghar hai