Tags-Ghar

maza to ye hai ki vo ḳhud to hai na.e ghar meñ
aur us kī yaad purāne makāñ meñ rahtī hai

hamārā ghar bhī sahrā ho gayā hai
magar 'ġhālib' sī vīrānī nahīñ hai

maiñ apne ghar ke andar chain se huuñ
kisī shai kī farāvānī nahīñ hai

ūñchī imāratoñ se makāñ merā ghir gayā
kuchh log mere hisse kā sūraj bhī khā ga.e

falak ke tāroñ se kyā duur hogī zulmat-e-shab
jab apne ghar ke charāġhoñ se raushnī na milī

zehn o dil ke fāsle the ham jinheñ sahte rahe
ek hī ghar meñ bahut se ajnabī rahte rahe

mire hañste hue bachcho ye saarā ghar tumhārā
maiñ rone ke liye bas ek konā chāhtā huuñ

bahut dinoñ se mire bām-o-dar kā hissa hai
mirī tarah ye udāsī bhī ghar kā hissa hai

supurd kar ke use chāñdnī ke hāthoñ meñ
maiñ apne ghar ke añdheroñ ko lauT ā.ūñgī

bedād mohtasib kī fariyād hai ḳhudā se
barse sharāb ghar ghar mai-ḳhvār kī duā se

pareshānī ye mujh se hañs ke bolī
tire ghar kī maiñ bachchī ho ga.ī huuñ

vo dilkashī vo tasavvur kisī nazar meñ nahīñ
tumhāre jaisī koī shai hamāre ghar meñ nahīñ

bādal ghar ghar aa.e nā
nadiyā ham ham gaay nā

aañkh hai ghar dil galī ye jism un kā shahr hai
Dākiya ko mujh meñ hī un kā patā mil jā.egā

yuuñ dil ko kiyā sho.ala-e-ġham tere havāle
is ghar meñ koī chiiz bachāne kī nahīñ thī

ik safar par use bhej kar aa ga.e
ye gumāñ hai ki ham jaise ghar aa ga.e

ghar ko jaate hue sharm aatī hai
raat kā ek bajā chāhtā hai

apne maañ baap chune koī ye mumkin hī kahāñ hai?
us pe ye mulk bhī lāzim thā ki maañ baap kā ghar thā is meñ

ghar hamārā jo na rote bhī to vīrāñ hotā
bahr gar bahr na hotā to bayābāñ hotā