Tags-Ghar

shaal chhoTī hī sahī rakh lo baḌī Thiik nahīñ
tum pe nikhregī bahut ghar meñ paḌī Thiik nahīñ

mujhe shāhrāh-e-hayat par ka.ī aise ghar bhī mile 'ziyā'
jahāñ qumqume na jale kabhī na vo hijr ke na visāl ke

hoñgī jis ghar meñ beTiyāñ yaaro
us kā māhaul ḳhushnumā hogā

ḳhaak ārām kī ḳhvāhish ho vatan se bāhar
jab hameñ chain 'tapish' apne hī ghar ne na diyā

ab ghar ke darīche meñ aa.egī havā kaise
aage bhī plāzā hai pīchhe bhī plāzā hai

huā achchhā ki vo ghar se na nikle
kise mālūm kis ke dil meñ kyā thā

vo kyā nigāh jo na kisī dil meñ ghar kare
vo dil hī kyā na ho jo kisī kī nigāh meñ

maiñ ik āvāra jhoñkā
ghar meñ kab tak rakhte ho

ghar kā ek akelā bachcha
nanhā-munnā taasī raaja

'hasan' ab khule āsmānoñ meñ parvāz karnā paḌegī
vagarna ye ḳhisht-e-havas se bane ghar mujhe maar deñge

'hasan' naamī hamāre ghar meñ ik 'suqrāt' guzrā hai
vo apnī naf.i se isbāt tak ma.ashar ke pahuñchā hai

haiñ ajab dastūr mere desh meñ ye in dinoñ
ghar meñ chorī jo kareñ vo ghar ke pahre-dār the

apne ghar sañg-e-malāmat kī huī hai bārish
be-gunāhī kī sanad ham jo dikhāne nikle

vo pech-o-tāb bagūloñ kā mere āñgan maiñ
chuḌeleñ ghar meñ ghus aa.ī haiñ khaul kar gesū

vahshat thī hameñ bhī vahī ghar-bār se ab tak
sar maare haiñ apne dar o dīvār se ab tak

ġhairoñ kī shikasta hālat par hañsnā to hamārā sheva thā
lekin hue ham āzurda bahut jab apne ghar kī baat chalī

jo kuchh ki hai duniyā meñ vo insāñ ke liye hai
ārāsta ye ghar isī mehmāñ ke liye hai

ik pal kahīñ ruke the safar yaad aa gayā
phūloñ ko hañstā dekh ke ghar yaad aa gayā

udhar sach bolne ghar se koī dīvāna niklegā
udhar maqtal meñ istiqbāl kī tayyāriyāñ hoñgī

ghar to ghar sar diye haiñ ġhurbat meñ
dasht meñ bhī saḳhī rahe haiñ ham