Tags-Ghar

aadhe ghar meñ maiñ hotā huuñ aadhe ghar meñ tanhā.ī
kaun sī chiiz kahāñ rakh dī hai kaun mujhe batlā.egā

mire saath saath safar meñ hai mire ghar kī saarī hamāhamī
sar-e-gosh qahqahe ras-bhare sar-e-dosh phuul gulāb kā

kī justujū to ek nayā ghar milā mujhe
barsoñ ke ba.ad merā muqaddar milā mujhe

ghar se niklā to jahāñ-zād ḳhudā itne the
maiñ anā-zād bhī kis kis kī parastish kartā

ġhazāl fikr ke āvāra ghūmte haiñ 'sahar'
tum un ko lā ke kisī roz apne ghar bāñdho

vā.izā mastoñ kā dil haigā ḳhudā kā ghar sarīh
toḌ mat us ke ta.iiñ sañg-sitam se kar azaab

yūñhī be-sabab na phirā karo koī shaam ghar meñ rahā karo
vo ġhazal kī sachchī kitāb hai use chupke chupke paḌhā karo

ye ḳhizāñ kī zard sī shaal meñ jo udaas peḌ ke paas hai
ye tumhāre ghar kī bahār hai use āñsuoñ se harā karo

ḳhudā kā ghar bhī hai dil meñ butoñ kī chaah bhī hai
sanam-kada bhī hai dil apnā ḳhānqāh bhī hai

lahū pī kar zamīñ jab bhī na.ī karvaT badaltī hai
kisī kā sar nikaltā hai kisī kā ghar nikaltā hai

kal thake-hāre parindoñ ne nasīhat kī mujhe
shaam Dhal jaa.e to 'mohsin' tum bhī ghar jaayā karo

ḳhirad ko ḳhāna-e-dil kā nigah-bāñ kar diyā ham ne
ye ghar ābād hotā is ko vīrāñ kar diyā ham ne

vahāñ bāzār kā hotā hai manzar
jahāñ ghar kī zarūrat boltī hai

yaksāñ hai dhuāñ jalte ḳharābe kī mahak tak
sannāTe kā ghar se diyā sunsān saḌak tak

abhī lauT aa.egā mirī hī tarah kuḌhtā sā
mere hī ghar kā pata pūchh gayā hai mujh se

vo ga.e ghar ġhair ke aur yaañ hameñ dam bhar ke baad
bad-gumānī un ke ghar sū ghar phirā kar le ga.ī

ḳhāna-e-zanjīr kā pāband rahtā huuñ sadā
ghar abas ho pūchhte mujh ḳhānamāñ-barbād kā

ghar meñ rah kar bhī ghar nahīñ rahtā
ḳhud ko yuuñ be-vatan kiye hue huuñ

dil meñ haiñ lekin unheñ dil se ġharaz-matlab nahīñ
apne ghar meñ rahte haiñ vo mehmānoñ kī tarah

apne nāḳhun apne chehre par ḳharāsheñ de ga.e
ghar ke darvāze pe kuchh bhūke sadā.eñ de ga.e