Tags-Ghar

har ek āñgan ḳhamosh pahre har ek lab par sukūt taarī
hamāre ghar ghar jo TūTte haiñ qayāmatoñ ke azaab paḌhnā

ajiib shahr hai ghar bhī haiñ rāstoñ kī tarah
kise nasīb hai rātoñ ko chhup ke ronā bhī

pahle to ik ḳhvāb thā ḳhākistar-o-ḳhāvar ke biich
ab añdherī shab hai haa.il us ke mere ghar ke biich

lo 'qamar'-sāhab zamāna chaal apnī chal gayā
aap itnā hī chale bas ghar ke aur daftar ke biich

baḌā hī ḳhushiyoñ bharā hañstā-bastā ghar hai mirā
isī liye to sabhī qumqume jale hue haiñ

saarā bāzār chalā aayā hai ghar meñ phir bhī
baaz aate haiñ kahāñ log ḳharīdārī se

na koī phuul hī rakhā na aarzū na charāġh
tamām ghar ko bayābān kar diyā maiñ ne

jab jab lage hai aag hamāre hī ghar jaleñ
ye baat ittifāq hai yā gahrī chaal

bāzār kā naqīb samajh kar mujhe na chheḌ
ḳhāmosh rahne de maiñ tire ghar kī baat huuñ

ghar bhī bāzār kī mānind rakhe haiñ apne
vo jo bāzār kā me.ayār sambhāle hue haiñ

kisī kī yaad se dil kā añdherā aur baḌhtā hai
ye ghar mere sulagne se munavvar ho nahīñ saktā

guzar gayā hai jo pahlū bachā ke mujh se to kyā
nazar jhukā ke vo ghar dekhtā gayā hai mirā

muhīt hai mire dīvār-o-dar pe tanhā.ī
na jaane kaun ise ghar batā gayā hai mirā

na.e sire se kareñ apnī zindagī āġhāz
na.ī zamīñ pe nayā ghar banā ke dekheñge

har baar palaTte hue ghar ko yahī sochā
ai kaash kisī lambe safar ko ga.e hote

maiñ vo musāfir-e-dasht-e-ġham-e-mohabbat huuñ
jo ghar pahuñch ke bhī soche ki ghar nahīñ aayā

dasht jāgīr hai majnūñ kī to kyā fikr 'nazar'
khod kar ghar ko banā lījiye vīrāna judā

dil arsh-gāh-e-husn hai dil jalva-gāh-e-nāz
ye aap hī kā ghar hai hamārī guzar kahāñ

chehre pe mire dard kī parchhā.īñ jo dekhī
bedard mire ghar se pareshān gayā hai

inkār nahīñ aap ke ghar chalne se mujh ko
maiñ chalne ko maujūd jo chhoḌo chalan apnā