Tags-Ghar

gul huā ye kis kī hastī kā charāġh
mudda.ī ke ghar jalā ghī kā charāġh

kisī aur hī ke ghar ko kījiyo sayyād tū taz.īñ
ham apne ḳhuun hī se is qafas par rañg karte haiñ

ghar se nikalnā bhī mushkil hai ghar meñ rahnā bhī mushkil hai
kaisā mausam bārish kī man-mānī se ho jaatā hai

galī galī ābād thī jin se kahāñ ga.e vo log
dillī ab ke aisī ujḌī ghar ghar phailā sog

konā bhī ek dil kā sābit nahīñ ye kis ne
is ghar ko kar diyā hai mismār sab taraf se

maiñ aaj apne ghar se nikalne na pā.ūñgā
bas ik qamīs thī jo mirā bhaa.ī le gayā

bahut mamnūn huuñ phir bhī añdhere kam nahīñ hote
agar tum mere ghar hote to vo raushan nahīñ hotā

pīchhe muḌ ke dekhnā achchhā lagā
ghar kā ḳhālī rāsta achchhā lagā

us ke jaate hī ye kyā ho ga.ī ghar kī sūrat
na vo dīvār kī sūrat hai na dar kī sūrat

ai meñh na baras ki 'mus.hafī' kī
chhat ghar kī tamām ghun rahī hai

kare na kyuuñ ye tire dil meñ ghar mire hamdam
maiñ apne sher ko dard-āshnā banātā huuñ

ghar jalā baiThe charāġhoñ kī havas meñ āḳhir
ghar kī qīmat to kisī ḳhāk-basar se pūchho

ye qimār-e-ishq hai ai bul-havas baazī na jaan
sar ga.e bahutoñ ke aur bahutoñ ke is meñ ghar ga.e

ek jo aayā use le god meñ dī ghar meñ jā
dūsre ko kaaḌh kar ghar se zamīñ meñ dhar ga.e

jaate hue ghar tum jo mujhe sauñp ga.e the
vo vaqt mujhe chhoḌ ke begāna huā hai

is hathelī meñ bahut sī dastakeñ rū-posh haiñ
us galī ke moḌ par ik ghar thā kal tak kyā huā

tilism-zār-e-shab-e-māh meñ guzar jaa.e
ab itnī raat ga.e kaun apne ghar jaa.e

zulfoñ kī tarah umr basar ho ga.ī apnī
ham ḳhāna-ba-doshoñ ko kahīñ ghar nahīñ miltā

ghar ko phūñk ke jaane vaalā
phir ke nahīñ hai aane vaalā

kisī kī yaad ke jaale haiñ mere hujre meñ
udāsiyoñ se mirā ghar sajā rahā hai koī