Tags-Ghar

dīvār ke pīchhe chhupe hue log bhī maare ga.e
aur apne ghar kā darvāza band karne vaale bhī

sūraj bhī thak ke Duub gayā shaam ho ga.ī
din-bhar jo mere saath thā vo ghar chalā gayā

kisī mahfūz goshe kī talab majbūr kartī hai
makīñ badle nahīñ jaate haiñ so ham ghar badalte haiñ

ghar se bāhar na nikaltā kabhī apne ḳhurshīd
havas-e-garmī-e-bāzār liye phirtī hai

phir oḌh lī hai ham ne tire naam kī chādar
phir dil se, vahī ghar kī zarūrat nahīñ jaatī

raat ko ghar se nikalte hue Dar lagtā hai
chāñd dīvār pe rakkhā huā sar lagtā hai

mujh se to dil bhī mohabbat meñ nahīñ ḳharch huā
tum to kahte the ki is kaam meñ ghar lagtā hai

chalo vo kufr ke ghar se salāmat aa ga.e lekin
ḳhudā kī mumlikat meñ soḳhta-jānoñ pe kyā guzrī

jām-e-ishq pī chuke zindagī bhī jī chuke
ab 'hilāl' ghar chalo ab to shaam ho ga.ī

na ho kis tarah shart-e-dilbarī duniyā meñ dildārī
jahāñ meñ ghar banānā sahl hai mushkil hai ghar rakhnā

ajiib log haiñ āzādiyoñ ke maare hue
qafas meñ pūchhte phirte haiñ ghar kahāñ tak hai

har ek chiiz jo apnī jagah par sajī sajā.ī ho
ḳhud hī ghar kā konā konā achchhā lagtā hai

aag bāñTī is tarah sab se baḌī jamhūriyat ne
bujh rahe chūlhe haiñ ghar meñ aur jañgal jal rahe haiñ

faqat māl-o-zar-e-dīvār-o-dar achchhā nahīñ lagtā
jahāñ bachche nahīñ hote vo ghar achchhā nahīñ lagtā

mujh ko urdu-e-muallā nahīñ aatī ab tak
tujh ko ye zo.am tire ghar kī zabāñ ho jaise

ham ko rakhtī hai nishāne pe siyāsat un kī
ghar jalāne pe ba-zid barq-e-tapāñ ho jaise

ghar chhoḌ aa.e aap bhī achchhā kiyā huzūr
ye to junūñ kī raah meñ pahlā qadam huā

daadī kā thā daulat-ḳhāna
ghar kyā thā ik jannat-ḳhāna

ā.ankhoñ meñ huā hai ghar terā dil kahtā hai rakh har dam parda
ho chashm-e-tamannā kyuuñ kar vā āshiq kī nazar hai partav-e-ruḳh

ġhash koī kisī ko hai saktā hai nūr-e-ḳhudā terā jalva
ho daḳhl tire ghar meñ kis kā yaañ hājib-e-dar hai partav-e-ruḳh