Tags-Gulshan

maiñ jab bhī phuul us kī yaad ke gulshan se chuntī huuñ
to 'bīnā' karb merā rañg kā paikar badaltā hai

kyā haiñ kisī ke gesu-e-mushkīñ khule hue
hai gulshan-e-jahāñ kī fazā itr-bār kyuuñ

un kī ḳhushbū se ḳhushbū hai gulshan ke sab phūloñ meñ
un ko chhū kar aane vaalī purvā.ī muskātī hai

jin ke khulne se duniyā kā har gulshan ābād huā
un kaliyoñ kī ḳhushī sajā kar shahnā.ī muskātī hai

aaj ik qabr pe 'ālim' ye likhā dekhā thā
sākin-e-gulshan-e-hastī na mujhe yaad kareñ

gul ruḳh-e-nāzuk zulf hai sumbul aañkh hai nargis seb-e-zanaḳhdāñ
husn se tum ho ġhairat-e-gulshan māshā-allāh māshā-allāh

bait-e-abrū hai maḳhzan-e-asrār
ḳhat hai chehre kā sharh-e-gulshan-e-rāz

phūloñ ko raas aayā na jab arsa-e-bahār
gulshan se haT ke gosha-e-dāmāñ meñ aa ga.e

mujhe haq gulshan-e-ījād kā gar bāġhbāñ kartā
to ashk-e-bulbuloñ ko ābyār-e-gulistāñ kartā

ġhuncha-o-gul kī hai ye zabāñ par sab hī fidā us sarv-e-ravāñ par
zikr hai us kā gulshan gulshan māshā-allāh māshā-allāh

shabnam kī jā-e-gul se Tapaktī haiñ shoḳhiyāñ
gulshan meñ kis kī ḳhāk-e-shahīdān-e-nāz hai

har shahr hamārā gulshan ho
hañstā huā har ik āñgan ho

na thī parvāz kī tāqat sar-e-dīvār-e-gulshan tak
ki jo taa.ir thā so sayyād ke hāthoñ se be-par thā

mausam-e-gul kunj-e-gulshan nik.hat-e-gesū na ho
ab yahī ḳhvāhish hai taskīñ kā koī pahlū na ho

gulshan-e-jāñ meñ un ke aane se
gul-sifat kārobār hotā hai

ai bahār-e-gulshan-e-nāz-o-nazākat har taraf
tere aane se huī hai aur bhī bustāñ meñ dhuum

phūloñ se chaman ābād bhī the daam apnā liye sayyād bhī the
sab kuchh thā 'jamīl' is gulshan meñ badlī jo havā to kuchh bhī nahīñ

ma.amūl judā.ī hai go phuul kī gulshan se
lekin jo huī anqā ḳhvāboñ meñ basī duniyā

yāsiyat ne karb ke dar vā kiye
ḳhushk ummīdoñ kā gulshan hai yahāñ

sabā jo pur mirā ai bāġhbāñ laatī hai gulshan meñ
qafas se saath yaañ tak hasrat parvāz aatī hai