Tags-Gulshan

ġhuncha-e-dil khile jo chāho tum
gulshan-e-dahr meñ sabā ho tum

ham ne dil meñ sajā liye gulshan
jab bahāroñ ne be-ruḳhī kī hai

vo husn ke gulshan meñ maġhrūr na ho kyūñ-kar
baḌhtī huī Daalī hai uThtī huī koñpal hai

sabz hai vādī-e-be-āb meñ gulshan merā
shab kī tasvīr meñ ye rañg kahāñ se aayā

'muztar' apne haq ke kāñTe chun ke maiñ ruḳhsat huā
aur kyā detī bahār-e-gulshan-e-fānī mujhe

tamām sabza-o-gul the mulāzim-e-mausam
kalī kā farz hī gulshan meñ muskurānā thā

sehn-e-gulshan meñ ba-har-ān badalte hue rañg
ik na.e daur-e-bahārāñ kī ḳhabar dete haiñ

vahī hai chashm-e-nargis kā tahayyur
nahīñ gulshan meñ koī dīda-var kyā

barg-e-hinā se likh ke nasīhat zamīn par
gulshan ko tere chhoḌ ke aurāq chal paḌe

vahī fazā vahī gulshan vahī havā hai magar
milī jo gul ko vo ḳhāroñ ko zindagī na milī

gul-ruḳhoñ ne kiye haiñ sair kā ThaaT
gulshan-ābād kā bharā hai haaT

sub.h kā darvāza khulte hī chalo gulshan kī samt
rañg uḌ jā.egā phūloñ kā agar tāḳhīr kī

gulshan-e-dil pe ḳhizāoñ kā tasallut hai 'nigār'
koī ḳhvāhish koī armāñ koī chāhat hī nahīñ

vo gulshan meñ yuuñ sair farmā rahe haiñ
idhar aa rahe haiñ udhar jā rahe haiñ

sayyād ne tere asīroñ ko āḳhir ye kah kar chhoḌ diyā
ye log qafas meñ rah kar bhī gulshan kā nazārā karte haiñ

terī ḳhushbū se mahakne lagā gulshan gulshan
Dāliyāñ phūloñ kī jhuk kar tujhe kahtī haiñ salām

'alī' o 'tālib' o 'shaidā' o 'tābāñ' 'sāqī' o 'mā.il'
huā tārāj gulshan jab ḳhizāñ aa.ī bahāroñ meñ

kāñToñ se ehtijāj kiyā hai kuchh is tarah
gulshan kī Daal Daal pe ham raqs kar ga.e

baiThe baiThe vo kiyā karte haiñ har gul pe nazar
dil-e-āshiq hai magar sair kā gulshan un kā

atā kī nahr-e-gulshan us ne apne ishq-bāzoñ ko
ijāzat dī yahāñ nikhre nahā.e jis kā jī chāhe