Tags-Gulshan

hāsil na pūchh gulshan-e-mash.had kā bul-havas
yaañ phal har ik daraḳht kā halq-e-burīda thā

guloñ par be-dilī kā rañg kyuuñ hai
anādil sahn-e-gulshan meñ ḳhajil haiñ

gulshan ke dīda-var hī tah-e-dām aa ga.e
jaadū jagā ke ḳhuub nasīm-e-sahar ga.ī

koī gulshan-parast kyā jaane
phuul meñ kis qadar haiñ vīrāne

har nazar rañgīnī-e-ruḳh tak pahuñch kar rah ga.ī
phuul ab kis se kaheñ gulshan meñ zaḳhm-e-dil kī baat

bahār-e-gulshan-e-hastī hai qaa.em shādī-o-ġham se
jo gul ḳhandāñ hai gulshan meñ to giryāñ sham-e-mahfil meñ

gul o bulbul kā gulshan meñ ḳhalal hove to barjā hai
chaman meñ jab chale vo gul-badan āhista-āhista

tū mile 'mehr' se iimā yahī tārīḳh ho sach
gulshan-o-bāda-o-gul meñ tujhe garmā.e havā

kyuuñ na le gulshan se baaj us arġhavāñ-sīmā kā rañg
gul se hai ḳhush-rañg-tar us ke hinā.ī pā kā rañg

gulshan meñ phuul khilte hī sad-chāk ho ga.e
rañgīn hādse the alamnāk ho ga.e

ye gulshan-e-yaqīñ bhī ba-juz vahm kuchh nahīñ
aalam jise kaheñ vo tilism-e-ḳhayāl hai

bulbul kaho gul kī kyā ḳhabar hai
gulshan meñ bahār kis qadar hai

is ek shart pe gulshan meñ dāḳhila hogā
kisī gulāb ke sāñche meñ Dhal sako to chalo

jab bhī lauTe pyaar se lauTe phuul na pā kar gulshan meñ
bhañvre amrit ras kī dhun meñ pal pal sau sau baar ga.e

sun ke gulshan meñ mire nāla-o-āh
bulbul-e-naġhma-sarā loT ga.ī

kis ko ma.alūm thā malbūs-e-sabā meñ sarsar
aa ke gulshan meñ shagūfoñ ko masal jā.egī

gulshan-e-yād meñ gar aaj dam-e-bād-e-sabā
phir se chāhe ki gul-afshāñ ho to ho jaane do

ġhuncha-e-gul kuuñ dekh gulshan meñ
gar tuuñ piv kā dahan nahīñ dekhā

ik umr huī ye soch ke ham jaate hī nahīñ gulshan kī taraf
tum aur bhī yaad aaoge hameñ jab gul koī khiltā dekheñge

sehn-e-gulshan meñ ki anjum kī tarab-gāhoñ meñ
tum ko dekhā hai kahīñ jaane kahāñ dekhā hai