Tags-Gulshan

na jānūñ nek huuñ yā bad huuñ par sohbat-muḳhālif hai
jo gul huuñ to huuñ gulḳhan meñ jo ḳhas huuñ to huuñ gulshan meñ

phuul gulshan ke nahīñ to ḳhāk-e-sahrā hī sahī
kuchh na kuchh to chāhiye taskīn-e-dāmāñ ke liye

zabt ne dekhā hai aisā vaqt bhī gulshan meñ jab
dād-ḳhvāhī ke liye gulchīñ se gul-ḳhane ga.e

ḳhudā kī shaan to dekho ki un ke gulshan meñ
nasīm le ga.ī bū-e-gulāb kar ke mujhe

sāf-shaffāf chamakte hue pur-nūr makāñ
sehn-e-gulshan meñ khile jaise hoñ rañgīn gulāb

ek alaav hai ye dahaktā huā
tumheñ jis par gumān-e-gulshan hai

sahn-e-gulshan ke phuul sharmā.e
koī bhī tujh sā ḳhush-libās nahīñ

ham haiñ vo balā dost ki gulshan kā to kyā zikr
jannat bhī bajā.e qafas o daam na lete

ai mere yāsman tire dandān-e-ābdār
gulshan meñ haiñ rulāte gul-e-yāsman mujhe

gulshan meñ urūs-e-gul ke uupar
shabnam motī luTā rahī hai

kaliyoñ ko khul ke hañsne kā andāz aa gayā
gulshan meñ aa ke tum jo zarā muskurā ga.e

gul-rū kī judā.ī meñ mire dāġh-e-jigar dekh
gulshan meñ har ek lāla-e-pur-ḳhūñ ne kahā bas

mausam-e-gul saath le kar barq o daam aa hī gayā
yaanī ab ḳhatre meñ gulshan kā nizām aa hī gayā

kāñToñ meñ hī kuchh zarf-e-samā.at nazar aa.e
gulshan meñ kahīñ to merī rūdād sunī jaa.e

bād-e-ḳhizāñ ne gulshan vīrāñ kiyā hai saarā
bulbul kī ab kahāñ vo rañgīñ-bayāniyāñ haiñ

afsos adam se aa ke kiyā kyā ham ne gulshan-e-hastī meñ
juuñ shabnam-o-gul royā na hañsā ye bhī na huā vo bhī na huā

gul sharm se bah jā.egā gulshan meñ ho kar aab sā
burqe se gar niklā kahīñ chehra tirā mahtāb sā

hai bahār-e-gulshan-e-duniyā do roz
bulbul-o-gul ke nazāre ho chuke

gulshan-e-hastī meñ dekhī thī bahār
auj par jo the sitāre ho chuke