Tags-Gulshan

sair-e-gul kartā thā vo aur aah betābī se maiñ
har taraf gulshan meñ juuñ āb-e-ravāñ dauḌā kiyā

phūloñ ke lahū se ye chaman-zār thā raushan
gulshan meñ kahīñ ḳhār-e-muġhīlāñ bhī nahīñ thā

hai rahīn ġham mirī justujū ye hai kaisā gulshan-e-rañg-o-bū
yahāñ kuchh gulo kī talāsh meñ ka.ī ḳhaar maiñ ne chubho liye

aur hī rañg pe hai aaj bahār-e-gulshan
sair ke vāste aa.e haiñ azīzān-e-vatan

kis ko ma.alūm thī is gulshan-e-aḳhlāq kī raah
maiñ ne phūloñ ko kiyā rañg-e-vafā se āgāh

ye nasīm-e-saharī aaj ḳhabar laa.ī hai
saal guzrā mire gulshan meñ bahār aa.ī hai

guloñ meñ shoḳh gulābī tumhīñ ne rañg bhare
chale bhī aao ke gulshan ne ab bulāyā hai

sabza kī tarah mujh ko is gulshan-e-ālam meñ
apnoñ se bhī qismat ne begāna banā rakkhā

log gulshan meñ to chalte haiñ sar-afrāzī se
un meñ kitne haiñ tah-e-dām tumheñ kyā ma.alūm

gulshan meñ mustaqil jo Thikānā nahīñ milā
sahrā navard ho ga.ī bistar-ba-kaf havā

vo sabā hai to rahe kis liye gulshan se pare
ye shab-e-gul hai to kyuuñ sej pe kāñToñ ke kaTe

shukr ai bād-e-fanā juuñ shajar-e-soḳhta maiñ
thā to gulshan meñ vale qābil-e-gulzār na thā

aaj gulshan meñ kis kā partav hai
har kalī gul kī sham.a kī lau hai

ham ko saare gulshan-e-āfāq meñ
bas pasand aa.e yahī do-chār rañg

āsmāñ par barq gulshan meñ sabā dariyā meñ mauj
jis jagah dekho nayā hai zulf lahrāne kā naam

ḳham-e-gesū ko chhuā thā kis ke
shab se gulshan meñ sabā-bandī hai

hamārī ḳhāk-e-marqad har taraf gulshan meñ bikhrā do
ki ham ne dil-jaloñ kī ḳhaak meñ iksīr dekhī hai

hai mukaddar nūr-e-mehr us rashk-e-gul ke hijr meñ
gulshan-e-charḳh-e-kuhan meñ gul hai gul meñ ḳhaak hai