Tags-Gunah

vo kaun haiñ jinheñ tauba kī mil ga.ī fursat
hameñ gunāh bhī karne ko zindagī kam hai

gunāhgār hamīñ the tamām ḳhilqat meñ
hameñ ko ashraf-e-maḳhlūq kā ḳhitāb milā

maiñ laḌkhaḌāyā to mujh ko gale lagāne lage
gunāhgār bhī merī hañsī uḌāne lage

manzil hai apnī apnī 'qalaq' apnī apnī gor
koī nahīñ sharīk kisī ke gunāh meñ

is faisle pe luT ga.ī duniyā-e-e.atibār
sābit huā gunāh gunahgār ke baġhair

kabhī hañste nahīñ kabhī rote nahīñ kabhī koī gunāh nahīñ karte
hameñ sub.h kahāñ se mile ki kabhī koī raat siyāh nahīñ karte

milī hai sham.a se ye rasm-e-āshiqī ham ko
gunāh haath pe le kar gunāhgār chale

kabhī tujh se 'inshā' ne bosa na māñgā
gunāhgār hai vo faqat ik nigah kā

taḳhta-e-dār pe chāhe jise laTkā diije
itne logoñ meñ gunāhgār koī to hogā

gunāhgār huuñ ai mādar-e-adam mujh ko
bilak bilak ke tire bāzuoñ meñ ronā hai

ġhair ke kahne se maarā un ne ham ko be-gunāh
ye na samjhā vo ki vaaqe meñ bhī kuchh thā yā na thā

nāqūs mai-kade meñ bajāyā to ye kahā
bande gunāhgār tire ai ḳhudā haiñ ham

tamām zahmateñ mere gunāh ke saa.e
tamām rāhateñ in.aam mere rab kā hai

siyāhkār siyah-rū ḳhatā-shi.ār aayā
tirī janāb meñ terā gunāhgār aayā

kahā thā kis ne ki shāḳh-e-nahīf se phūTeñ
gunāh ham se huā be-gunāhiyoñ jaisā

kis sitamgar kā gunāhgār huuñ allāh allāh
kis ke tīroñ se dil-afgār huuñ allāh allāh

rakkhā jināñ meñ bhī hameñ maġhmūm tā-abad
iqrār ham se le ke hamāre gunāh kā

behtar kahīñ the mujh se vo mai-ḳhvār sāqiyā
hiila jo DhūñDte rahe afu-e-gunāh kā

jī bhar ke dekh luuñ to kar is jurm par shahīd
yuuñ apne sar pe ḳhuun na le be-gunāh kā

tā-umr āshnā na huā dil gunāh kā
ḳhāliq bhalā kare tirī tirchhī nigāh kā