Tags-Gunah

tere bin hayāt kī soch bhī gunāh thī
ham qarīb-e-jāñ tirā hisār dekhte rahe

jo chhupā ke pyāsoñ se maiñ piyūñ jo kisī ke haath se chhīn luuñ
to vo pyaas mujh se gunāh hai to vo jaam mujh pe harām hai

ye gunāhgāroñ kī sar-zamīñ hai bahisht se bhī sivā hasīñ
magar is dayār kī ḳhaak meñ sabab-e-numū koī aur hai

sayyāra-e-gunāh kā saaya jidhar paḌā
taare siyāh-posh the sūraj gahan meñ thā

ḳhvāhish gunāh hai to gunahgār maiñ bhī huuñ
haiñ jurm be-hisāb sazā kī kise ḳhabar

zaḳhm le kar ye sabhī apne maiñ jaatā bhī kahāñ
yuuñ bhī ijlās gunāhgār sambhāle hue haiñ

jis ne koī gunāh kiyā hī na ho kabhī
aisā to koī shaḳhs yahāñ paak bhī nahīñ

savāb ko na.ī shakleñ jo de rahā hai tū
gunāh ke na.e sāñche banā rahā huuñ maiñ

gunāhgār sahī chor maiñ nahīñ zāhid
hai ye bhī kufr ki ka.abe se muñh phirā ke piyūñ

nisbat hī kyā savāb ko mere gunāh se
sau sau savāb haiñ mire ik ik gunāh meñ

pahle gunāhgār tamāshā huī nigāh
lazzat-sharīk phir huā dil is gunāh meñ

maiñ kam hī rahtā huuñ 'anjum' ḳhudā kī sohbat meñ
gunāhgār ko ḳhauf-e-ḳhudā musībat hai

huā na ham se mudāvā-e-dard-e-nau-e-bashar
bahut chale to savāb-o-gunāh tak pahoñche

luTtā hai ḳhāna-e-dil-e-āshiq bachā.iye
bigḌī huī hai fauj-e-mizha kis gunāh par