Tags-Haar

merī nazroñ ko ḳhudā-rā dāvat-e-kāvish na de
jagmagāte motiyoñ ke haar ko jumbish na de

har kisī ne aañkh jab Daalī gulū-e-sāf par
hañs ke farmāyā gale kā haar āñkheñ ho ga.iiñ

haar dekhā bhī ḳhūn-e-āshiq kā
aap aur sar jhukā.e baiThe haiñ

pītāmbar nafīs kamar meñ kasā huā
ḳhushbū se haar phuul kī mandir basā huā

maiñ sach kahūñgī magar phir bhī haar jā.ūñgī
vo jhuuT bolegā aur lā-javāb kar degā

apne gale ke haar ke gar vo chaḌhā.e phuul
phūlā na phir samā.ūñ maiñ kunj-e-mazār meñ

phūloñ kā haar ban gayā hai motiyoñ kā haar
aisā ḳhushī se phuul gayā dast-e-yār meñ

aañsū bahā.ūñ āñkhoñ se us ko lagā ke maiñ
motī piro.ūñ yaar kī phūloñ ke haar meñ

lipTī hai choTī yaar kī phūloñ ke haar meñ
sumbul ne gul khilā.e haiñ fasl-e-bahār meñ

farmā.ish apnī dekhne vāloñ pe kartī haiñ
āñkhoñ ke Dore hoñ mire phūloñ ke haar meñ

kitne arbāb-e-himmat ne un ke liye baḌh ke maidān meñ jaan bhī haar dī
ab bhī un kī nigāhoñ meñ hai bad-zanī ab bhī un ko vafā kī sanad chāhiye

guñdhvā ke dil ko laa.e haiñ phūloñ ke haar meñ
ye haar un ko nazr kareñge bahār meñ

kafnā.e bāġhbāñ mujhe phūloñ ke haar meñ
kuchh to burā ho dil mirā ab kī bahār meñ

shāyad jagah nasīb ho us gul ke haar meñ
maiñ phuul ban ke ā.ūñgā ab kī bahār meñ

manzileñ laakh kaThin aa.eñ guzar jā.ūñgā
hausla haar ke baiThūñgā to mar jā.ūñgā

Darne vāloñ ko duniyā Darātī rahī Darne vāloñ ko duniyā Darātī rahe
tum Daroge na duniyā se lekin agar haar kar tum se duniyā hī Dar jā.egī

dil-o-jāñ kar ke fidā un ko banāyā apnā
ishq ke khel meñ jiit apnī huī haar ke ba.ad

jo is vaqt jañgal meñ buuTī jaḌī hai
so vo nau-lakhā haar pahne khaḌī hai

dar-ba-dar hai to kahīñ jī nahīñ lagtā hogā
vo bhī din aa.egā thak-hār ke ghar jā.egā tū

ik aur karbalā hai tire dar ke sāmne
apne lahū ko jiit le baazī ko haar kar