Tags-Haar

hotī hai haar jiit pinhāñ baat baat meñ
chaupaḌ bichhī hai anjuman-e-kā.enāt meñ

haañ haar maan lī tirī yādoñ ke rū-ba-rū
is baar kufr-e-sañg meñ tesha utar gayā

abhī sumūm ne maanī kahāñ nasīm se haar
abhī to ma.arka-hā-e-chaman kuchh aur bhī haiñ

jo kar rahā thā barābar nasīhateñ mujh ko
vo ek daav meñ saarī hayāt haar aayā

ye chāhne vaale chāhte the gale kā haar apnā kar ke rakhiye
diye na kis kis ne us ko dhāge na dam meñ vo gul-ezār aayā

motiyā kā haar o champā kī chhaḌī
joḌā-e-dāman-kinārī yaad hai

usī ne sab se pahle haar maanī
vahī sab se dilāvar lag rahā thā

jo tū aa.e bisāt-e-zindagī par
to ḳhud ko haar jaanā chāhtā huuñ

apnī nīndeñ apnī rāteñ apnī āñkheñ apne ḳhvāb
tum ko jītne kī ḳhātir meñ apnā sab kuchh haar gayā

mujh ko zinda rahne kā ik jazba aa ke maar gayā
maiñ apnī sāñsoñ se āḳhir laḌte laḌte haar gayā

lab-e-iz.hār pe jab harf-e-gavāhī aa.e
āhanī haar liye dar pe sipāhī aa.e

agar ḳhvāhish hai tujh kuuñ ai 'sirāj' āzād hone kī
kamand-e-aql kuuñ hargiz gale kā haar mat kiijo

ḳhairāt meñ de aayā huuñ jiitī huī baazī
duniyā ye samajhtī hai ki maiñ haar gayā huuñ

ḳhvāboñ ne jo ik khel banāyā thā mire dost
is khel meñ ta.abīr se maiñ haar gayā huuñ

mushkil hai tujhe aag ke dariyā se bachā luuñ
ai shahr-e-peshawar maiñ tujhe haar gayā huuñ

ziist kī gardan meñ hai pazhmurda afsānoñ kā haar
maut ke shānoñ pe hai salmā-e-getī kā nikhār

aur thoḌā sā bikhar jā.ūñ yahī Thānī hai
zindagī maiñ ne abhī haar kahāñ maanī hai

phūloñ kī sej uupar sote haiñ kitne ban-ban
so haiñ gulābī joḌe phūloñ ke haar abran

daroñ ko chuntā huuñ dīvār se nikaltā huuñ
maiñ ḳhud ko jiit ke is haar se nikaltā huuñ

haar bedard havāoñ se na maanī 'qaisar'
bādbāñ pheñk ke qadmoñ se bhañvar bāñdh liyā