Tags-Haar

paas hī manzil-e-murād ḳhaak meñ thī chhupī huī
raah meñ pā-burīda log baiTh chuke the haar kar

zindāñ meñ mujhe hai sair-e-gulshan
zanjīr kuuñ haar būjhtā huuñ

ik haar hai surḳh gulāboñ kā ik chādar surḳh gulāboñ kī
aur kitnā ruup chaḌhā mujh par is baat kā to iqrār karo

ab mujh ko ruḳhsat honā hai kuchh merā hār-siñghār karo
kyuuñ der lagātī ho sakhiyo jaldī se mujhe tayyār karo

gale kā haar kahīñ ban na jaa.e mahrūmī
na honā bhuul ke husn-e-takallufāt meñ gum

jal rahe haiñ jo lahū se un diyoñ ke sāmne
haar baiThe haiñ parastrān-e-sarsar sarsar samet

paḌāv hotī huī manzileñ na thiiñ manzūr
so haar thak ke 'sabā' ham bhī apne ghar nikle

hai talḳh-tar hayāt is sharāb se
tū ishq haar degā ijtināb se

qafas khulā thā magar fāḳhta kahāñ jaatī
vo apnī haar ko taslīm kar chukī thī vahāñ

haar hī jiit hai ā.īn-e-vafā kī rū se
ye vo baazī hai jahāñ jiit ke haare saare

kab us kī fat.h kī ḳhvāhish ko jiit saktī thī
maiñ vo farīq huuñ jis ko ki haar jaanā thā

hai jiitā dil ko baazī haar kar bhī
mohabbat hai to shah aur maat kyā hai

ham to baazī lagā ke haar chuke
dosto ab tumhārī baarī hai

ham se badte ho shart phir dekho
baar baar haar haar jaate ho

ab mirā saath nahīñ detā piyāda dil kā
haar jā.ūñ na maiñ aa kar tirī chāloñ meñ kahīñ

hamārī jiit yahī thī ki ḳhud se haar aa.e
kisī ke ham pe ka.ī qarz the utaar aa.e

ḳhushī kā ek nayā zāviya ubhartā hai
ham apne bachchoñ se jis vaqt haar jaate haiñ

saḌak saḌak mahak rahe the gul-badan saje hue
thake badan ik ik gale kā haar le ke chal diye

jarāhateñ milīñ hameñ bhī inkisār ke evaz
jhukā ke sar sadāqatoñ kī haar le ke chal diye

kyā ajab hai ki ho beTe kī faqat haar pe haar
aur maañ kā use har baar sikandar kahnā