Tags-Haar

ye khel ḳhatm banā hār-jīt ke hogā
ki jis hunar meñ vo yaktā usī meñ māhir maiñ

ajiib dhuñd hai maiñ apnī haar meñ 'ālam'
shikast-e-gumbad-o-mehrāb dekh letā huuñ

ham haar ga.e tum jiit ga.e ham ne khoyā tum ne paayā
in chhoTī chhoTī bātoñ kā ham koī ḳhayāl nahīñ karte

ghar meñ koī ārām kī sūrat nahīñ phir bhī
thak-hār ke ghar jaate haiñ ma.alūm nahīñ kyuuñ

mohabbat ko gale kā haar bhī karte nahīñ bantā
kuchh aisī baat hai inkār bhī karte nahīñ bantā

vāqif kahāñ zamāna hamārī uḌaan se
vo aur the jo haar ga.e āsmān se

vaqt-e-sahar guzar ga.ī kyā kiyā na pūchhiye
gardan meñ un kī sūkhe hue haar dekh kar

jo ġham ke sho.aloñ se bujh ga.e the ham un ke dāġhoñ kā haar laa.e
kisī ke ghar se diyā uThāyā kisī ke dāman kā taar laa.e

savād-e-shām se tā-sub.h-e-be-kinār ga.ī
tire liye to maiñ har baar haar haar ga.ī

apnoñ se jañg hai to bhale haar jā.ūñ maiñ
lekin maiñ apne saath sipāhī na lā.ūñgā

kahāñ ye 'ḳhair' kahāñ haar jiit kā ḳhadsha
ki jism o jaan kī baazī se jī nahīñ bhartā

mujh ko thī nā-pasand use shā.irī pasand
thak-hār ke ye aib bhī āḳhir hunar kiyā

thā jo shab ko sāya-e-ruḳhsār meñ
tāzgī kitnī hai baasī haar meñ

jītne mārka-e-dil vo lagātār gayā
jis ghaḌī fat.h kā ailān huā haar gayā

apnoñ meñ haar jiit ke ma.anī hī aur haiñ
ḳhush huuñ bahut ki un se mujhe maat ho ga.ī

maiñ boltā gayā huuñ vo suntā rahā ḳhāmosh
aise bhī merī haar huī hai kabhī kabhī

kyūñkar na tujhe dauḌ ke chhātī se lagā luuñ
phūloñ kā gale meñ tire ye haar ġhazab hai

jañg anā kī haar hī jaanā behtar hai ab laḌne se
maiñ bhī huuñ TuuTā TuuTā sā bikhrā bikhrā tū bhī hai

gale meñ tū ne vahāñ motiyoñ kā pahnā haar
yahāñ pe ashk-e-musalsal gale kā haar rahā

jaise purānā haar thā rishta tirā mirā
achchhā kiyā jo rakh diyā tū ne utaar ke