Tags-Haar

tum apnī kaj-kulāhī haar baiThīñ
badan ko be-libāda kar liyā kyā

mujhe yaqīn hai tū shart haar jā.egā
ki dastaras se tirī āsmān ūñchā hai

ye raat ek na.ī yādgār laa.ī hai
sajā ke zaḳhmoñ ke phūloñ kā haar laa.ī hai

'nazīr' āḳhir ko haar kar maiñ galī meñ us kī gayā thā bikne
tamāshā hotā jo mujh ko le kar vo shoḳh apnā ġhulām kartā

jab bhī palTe haiñ hameñ haar dikhā.ī dī hai
ham ne sikke ye ka.ī baar uchhāle hue haiñ

ḳhatm sab kuchh haar se hotā nahīñ
uTh aur ehsās-e-ziyāñ par ḳhaak Daal

ab us ko apnī haar kahūñ yā kahūñ maiñ jiit
rūThā huā thā maiñ vo manā le gayā mujhe

merī nazroñ ko ḳhudā-rā dāvat-e-kāvish na de
jagmagāte motiyoñ ke haar ko jumbish na de

tum zanjīreñ nīlām karo ham haar banāte jā.eñge
bārūd ke badle phūloñ ke ambār lagāte jā.eñge

haar kal pahne the phūloñ ke nishāñ hai ab tak
ḳhatm hai gul-badanoñ meñ tirī nāzuk-badanī

is sāhirāna kashish se haar kar
apnā tahmad utaar kar

ye bhuul jā ki haiñ tere bhī ġham-gusār bahut
banānā kāġhzī phūloñ ke ḳhushk haar bahut

bigāḌnā sañvārnā hai vaqt ke mizāj par
jo Thokaroñ meñ thā vo ab gale kā haar ho gayā

sau nabī sadqe 'qutub' dhan gal bā
raat din is gale kā haar kiye

dushman se hār-jīt kā honā thā faisla
to vāpsī ke ham ne safīne jalā diye

hañs hañs ke chheḌ us ko zinhār tū na ai dil
hogā gale kā tere ye haar hañste hañste

shart meñ bosoñ kī bhī kiyā lutf hai
jiit meñ kam-tar mazā hai haar se

hue na zer kisī intihā se laḌte hue
mahāz haar ga.e ham qazā se laḌte hue

haar ho jaatī hai jab maan liyā jaatā hai
jiit tab hotī hai jab Thaan liyā jaatā hai

ab mire gird Thahartī nahīñ dīvār koī
bandisheñ haar ga.iiñ be-sar-o-sāmānī se