Tags-Hadsa

phir koī apnī vafā kā vāsta dene lagā
duur se āvāz mujh ko hādsa dene lagā

ek ho to roiye kis kis ko ro.eñ yaad kar
dekh kar us hādisa ko dil dīvāna ho gayā

hādisa kaun sā huā pahle
raat aa.ī ki din Dhalā pahle

hameñ ye vaqt Darātā kuchh is tarah bhī hai
Thahar na jaa.e kahīñ hādsa guzarte hue

har sub.h mere sar par ik hādisa nayā hai
paivand ho zamīñ kā sheva is āsmāñ kā

ajiib haal hai andar kī ḳhalfashārī kā
kise ḳhabar thī ki aisā ye hādisa hogā

rañg 'mumtāz' chehre kā aisā khilā zindagī meñ nayā hādisa ho gayā
aa.ina aur maiñ donoñ hairān the maiñ bhī sharmā ga.ī vo bhī sharmā gayā

manzil pe aa ke 'shād' ajab hādisa huā
maiñ ham-safar ko bhuul gayā ham-safar mujhe

hādsa ye hai ki saarī zillatoñ ke bāvajūd
rafta rafta zaḳhm sū-e-indimāl aa jā.egā

ye hādsa mirī āñkhoñ se gar nahīñ hotā
to koī ġham bhī mirā ham-safar nahīñ hotā

na jaane raah meñ kyā us pe hādsa guzrā
ki umr bhar na nazar se zabān tak pahuñchā

ham ab to us ko bhī ik hādsa samajhte haiñ
ḳhayāl thā ki koī hādsa nahīñ guzrā

dil o nazar pe tire ba.ad kyā nahīñ guzrā
tujhe gumāñ ki koī hādsa nahīñ guzrā

mirī shikast mirī fat.h kuchh nahīñ ya.anī
vo hādsa thā koī merā imtihān na thā

maiñ huuñ ik hādisa ga.ī rut kā
qissa-e-motabar se miltā huuñ

kahīñ par bhī sambhalne kī ye mohlat hī nahīñ detā
kanār-e-vaqt se har hādsa ik dam nikaltā hai

raat ik hādsa huā mujh meñ
ek darvāza sā khulā mujh meñ

ajab tanāv hai māhaul meñ kaheñ kis se
kahīñ pe aaj koī hādsa huā to nahīñ

dil-e-ġham-zada pe guzar gayā hai vo hādsa ki mire liye
na to ġham rahā na ḳhushī rahī na junūñ rahā na parī rahī

ye hādisa tujhe shāyad udaas kar degā
ki mere saath hī martī hai tere hijr kī shaam