Tags-Hadsa

barham huā thā merī kisī baat par koī
vo hādisa hī vaj.h-e-shanāsā.ī ban gayā

badle badle haiñ āshnā chehre
dosto hādisa huā kyā hai

ḳhud hādsa bhī maut pe us kī thā dam-ba-ḳhud
vo dūsroñ kī jaan bachāne meñ rah gayā

navāh-e-jāñ meñ ajab hādisa huā ab ke
badan kā saarā asāsa bikhar gayā ab ke

hādisa bhī hone meñ vaqt kuchh to letā hai
baḳht ke bigaḌne meñ der kuchh to lagtī hai

ik hayūlā hai ghar ḳharābī kaa!
varna kyā ḳhaak ghar meñ rakkhā hai

milā to hādisa kuchh aisā dil ḳharāsh huā
vo TuuT phuuT ke bikhrā maiñ paash paash huā

'jāmī' fazā-e-mausam-e-gul yuuñ udaas hai
jaise kahīñ qarīb koī hādsa huā

hādsa koī to guzrā hai yaqīnan yaaro
ek sannāTā hai mujh meñ kisī maqtal kī tarah

'farāz' is tarah zindagī hai gizārī
ki goyā koī hādsa chhoḌ aa.e

jām-e-jam the jo mire dost kabhī
hādsa hai ki ḳhabar lagte haiñ

tirī judā.ī kā hādsa aisā hādsa hai
jo har haqīqat se har kahānī se muḳhtalif hai

yuuñ to har hādsa bhūlā lekin
us kā milnā kabhī bhūlā hī nahīñ

hai baat us kī achchhī lagtī hai dil ko sachchī phir bhī hai thoḌī kachchī
jo us kā hādisa hai merā bhī tajraba ho ye baat to ġhalat hai

bahut dinoñ se koī hādsa nahīñ guzrā
kahīñ zamāne ko ham yaad phir na aa jaa.eñ

dard-shanās dil nahīñ jalva-talab nazar nahīñ
hādsa kitnā saḳht hai un ko abhī ḳhabar nahīñ

barf thī kohrā bhī thā aur ḳhāmushī
dekh kar vo hādisa ham Dar ga.e

tamām log use zindagī bulāte the
kisī kisī ne kahā hādisa mohabbat ko

maiñ terī yaad meñ gum thā ki khā gayā Thokar
ye hādsa mirī rāhoñ meñ baar baar huā

guzishtanī hai ye sab kuchh jo hone vaalā hai
vo hādsa bhī guzar jā.egā kabhī na kabhī