Tags-Hadsa

maiñ ne rokā bhī nahīñ aur vo Thahrā bhī nahīñ
hādisa kyā thā jise dil ne bhulāyā bhī nahīñ

ek hī hādsa to hai aur vo ye ki aaj tak
baat nahīñ kahī ga.ī baat nahīñ sunī ga.ī

kyuuñ aap kī ḳhushī ko mirā ġham kare udaas
ik talḳh hādisa huuñ bhulā dījiye mujhe

hādisa ek bhī nahīñ guzrā
be-sabab bad-havās hai koī

koī ik hādisa ho gar kareñ ham zikr bhī us kā
guzarte haiñ yahāñ to hādse par hādse dil par

hādisa hai lekin aisā ġhair-ma.amūlī nahīñ
sham.a par parvāna jalne de koī parvāna kar

ham ne apnī āñkhoñ se hādsa vo dekhā thā
pattharoñ kī bastī meñ zaḳhm sar ke ro.e the

mohabbat ik musalsal hādisa thī
hamāre be-vafā hone se pahle

ye hādisa bhī huā hai ki ishq-e-yār kī yaad
dayār-e-qalb se begāna-vār guzrī hai

abhī milā thā abhī phir bichhaḌ gayā koī
ye hādsa bhī hikāyāt-e-būd-o-hast lage

dil kī dīvāroñ pe ye rañg-e-shab-e-tār to dekh
hādisa chhoḌ gayā hai koī saaya apnā

ye vāqi.a hai ki dekhā thā ḳhvāb manzil kā
ye hādisa hai ki ab rāsta bhī yaad nahīñ

ḳhūb-sūrat sā koī hādisa āñkhoñ meñ liye
ghar kī dahlīz pe Darte hue ham aate haiñ

har sahar hādisa mirī ḳhātir
bhar ke ḳhuuñ kā ayāġh nikle hai

fasīl-e-jism pe kuchh naqsh chhoḌ jā.egā
jo hādisa mire dil par guzarne vaalā hai

shahr jal bujh gayā log mar kab ga.e
sub.h-e-nau kal nayā hādisa dekhiye

ye kaisā hādsa guzrā ye kaisā sāneha biitā
na āñgan hai na chhat baaqī na haiñ dīvār-o-dar baaqī

kahīñ andar andar sulagtī thī chiñgārī koī
magar hādsa āḳhir-e-kār shām-e-guzishta huā hai

ba-zāhir lag rahī thī iiñT lekin
saḌak par hādisa rakkhā huā thā

vo laḌkī lagtī thī ajnabī sī zarā se khaTke pe chauñktī thī
ye us ke saath hādsa huā kyā ki baiThe baiThe bikhar ga.ī vo