Tags-Hadsa

āstīñ meñ saañp ik paltā rahā
ham ye samjhe hādsa Taltā rahā

kyā huiiñ fikr-o-tasavvur kī tire ra.anā.iyāñ
hādisa aisā bhī kyā 'tanvīr' tum par ho gayā

sar-e-rāh mil ke bichhaḌ ga.e thā bas ek pal kā vo hādsa
mire sehn-e-dil meñ muqīm hai vahī ek lamha azaab kā

zamīn shaq huī āñkhoñ meñ bhar gayā sūraj
hamāre sar pe achānak vo hādisa TuuTā

mujhe ḳhabar thī mirā intizār ghar meñ rahā
ye hādsa thā ki maiñ umr bhar safar meñ rahā

chalo 'arsh' mahfil-e-dost meñ ki payām-e-dost bhī hai yahī
vo jo hādisa thā firāq kā sar-e-dushmanāñ se guzar gayā

tum ne pūchhā hai na kuchh ham ne kahā hai yaaro
hādisa ham pe jo guzrā hai to kyā hai yaaro

us kā aaseb mujh pe barsegā
hādsa ye bhī jhelnā thā mujhe

aaj to ik hādisa us ko bhī nañgā kar gayā
laakh parde the paḌe jis shaḳhs ke kirdār par

bārhā ye sochā hai ghar se aaj chalte vaqt
hādisa na ho jaa.e raah se guzarte vaqt

hairān huuñ ki aaj ye kyā hādisa huā
hai aag sard dil bhī hai merā bujhā huā

na bhuul paa.e tumheñ hādisa hī aisā thā
na bhar sakā koī us ko ḳhalā hī aisā thā

hādisa hai ki sitāroñ se mujhe vahshat hai
mujh ko is dasht ke ādāb sikhā do koī

hādisa ain us jagah pe huā
maiñ jahāñ se guzarne vaalā thā

agar vo hādisa phir se huā to
maiñ tere ishq meñ phir paḌ gayā to

na socho tark-e-ta.alluq ke moḌ par ruk kar
qadam baḌhāo ki ye hādsa zarūrī hai

ġham ke hāthoñ mire dil par jo samāñ guzrā hai
hādisa aisā zamāne meñ kahāñ guzrā hai

maut jis roz mere dil ko milī
bhuul jā.ūñ vo hādisa kaise

har ik gaam par hādisa ham-safar hai
kaThin kis qadar zindagī kī Dagar hai

ye hādisa mujhe hairān kar gayā sar-e-shām
jo zaḳhm sub.h milā thā vo bhar gayā sar-e-shām