Tags-Hadsa

hādsa ye hai ki ham jaañ na mo.attar kar paa.e
vo to ḳhush-bū thā use yuuñ bhī bikhar jaanā thā

ham se dīvāne gar nahīñ hote
shahr ye hādsa hī ban jaatā

vo ek pal ko mujhe itnā sach lagā thā ki bas
vo hādisa thā magar aisā hādisa thā ki bas

likkhā thā tum ne ḳhat meñ ki tum ne bhulā diyā
kyā hādsa huā hai ki ham yaad aa ga.e

Duube hue jahāz pe kyā tabsira kareñ
ye hādisa to soch kī gahrā.ī le gayā

hādisa jo bhī ho chup-chāp guzar jaatā hai
dil se achchhā koī rasta nahīñ dekhā maiñ ne

hādisa kyā thā 'kiran' kuchh na samajh meñ aayā
umr bhar kis ke liye ḳhud ko gañvāyā ham ne

shorīda-sar vo huuñ ki use sar se toḌ duuñ
gar sañg-e-hādsa bhī gire āsmān se

kise ḳhabar thī ki ye vāqi.a bhī honā thā
ki khel khel meñ ik hādsa bhī honā thā

tujh se bichhaḌnā koī nayā hādsa nahīñ
aise hazāroñ qisse hamārī ḳhabar meñ haiñ

hādsoñ ke shahr meñ ik hādsa ye bhī huā
ek shīsha aa gayā hai pattharoñ ke darmiyāñ

vo bichhaḌ gayā to pata chalā ki thā saḳht kitnā ye hādisa
gayā nuur jaise charāġh kā ki badan se aks judā huā

ishq uftād-e-nā-gahānī hai
hādisa ye huā na thā pahle

maiñ us kī baat kī tardīd karne vaalā thā
ik aur hādsa mujh par guzarne vaalā thā

december kī kahānī aur kuchh thī
mire dil kā ujaḌnā hādisa hai

rañg hī rañg thā shahr-e-jāñ kā safar
raah meñ jism kā hādsa bhī rahā

hone vaalā thā ik hādsa rah gayā
kal kā sab se baḌā vāqi.a rah gayā

ye hādsa hai ki donoñ ḳhizāñ-sarisht hue
magar bahār kā ik ahd darmiyān meñ thā

zarā sī baat se manzar badal bhī saktā thā
jo hādisa huā bastī meñ Tal bhī saktā thā

ujāltī nahīñ ab mujh ko koī tārīkī
sañvārtā nahīñ ab koī hādsa mujh ko