Tags-Hadsa

is hādisa-gāh-e-hastī meñ Takrā.eñge do dil kuchh bhī karo
pariyoñ ke liye vo laakh uḌeñ gulfām se bachnā mushkil hai

Takrā ke bach gayā huuñ basoñ se ka.ī dafa
ab ke jo hādisa ho to samjho nahīñ huuñ maiñ

vo yuuñ mujh ko bhulānā chāhte haiñ
ki jaise maiñ bhī koī hādisa huuñ

yuuñ chup hai shahr jaise ki kuchh bhī huā na ho
shāyad ab is ke ba.ad koī hādisa na ho

hādisa kaisā ye guzrā hai ki har sū mujh ko
karb-o-āzār kā tūfān nazar aatā hai

shahr par tūfān se pahle kā sannāTā hai aaj
hādisa hone ko hai yā sāneha Talne ko hai

huzūr-e-dost ajab hādisa huā yaaro
har ek harf-e-shikāyat ne ḳhud-kushī kar lī

ik shikast-e-ā.īna ban ga.ī hai sāneha
TuuT jaa.e dil agar koī hādsa nahīñ

ye irtiqā kā faiz thā yā mahz hādisa
meñDak to fīl-pā hue azhdar vahī rahā

javāñ-lāshe pe haiñ shikva-ba-lab kāñdhe za.īfī ke
agar vo chāhtā ye hādisa hone nahīñ detā

rā.egānī kā āriza hai mujhe
zindagī ek hādisa hai mujhe

ab aate lamhoñ ke āsār ye batāte haiñ
jo vaqt biit gayā us ko hādsa likkhūñ

hone vaalā thā ik hādsa rah gayā
kal kā sab se baḌā vāqi.a rah gayā

zindagī meñ yuuñ to har ik hādisa nāgāh thā
jism ke parchhā.īñ banñe kā amal jāñ-kāh thā

huā thā hādisa kuchh aur lekin
likhegā aur kuchh aḳhbār tai hai

har hādisa-e-nau se ulajhte ga.e har gaam
ham rahguzar-e-shauq se guzarāñ nahīñ guzre

har gaam hādsa hai Thahar jā.iye janāb
rasta agar ho yaad to ghar jā.iye janāb

ye shaam itnī ujaaḌ kyuuñ hai nayā koī hādisa huā hai
ye ḳhuuñ kī surḳhī shafaq ke rañgoñ meñ ghul ga.ī be-vajah nahīñ hai

ādatan pūchhne lage haiñ log
kyā koī hādsa huā hai yahāñ

roz ik hādsa is meñ bhī samā jaatā hai
jīte-jī kaisā ye mahshar huiiñ āñkheñ merī