Tags-Hasrat

madad ai lazzat-e-zauq-e-asīrī ab ye hasrat hai
qafas vaale badal lete hamārā āshiyāñ ham se

mujassam dāġh-e-hasrat huuñ sarāpā naqsh-e-ibrat kā
mujhe dekho ki hotā hai yahī anjām ulfat kā

mirī qudrat se ab iḳhfā-e-rāz-e-ishq bāhar hai
ki rañg aane lagā hai āñsuoñ meñ ḳhūn-e-hasrat kā

nāseh ne kū-e-yār kā rasta bhulā diyā
achchhā huā ki hasrat-e-dīdār mar ga.ī

na kyūñkar rashk-e-dushman se ḳhalish ho ḳhār-e-hasrat kī
ye vo kāñTā hai jis se paañv meñ kyā dil meñ chhāle haiñ

havā kā ta.āqub kabhī chāñd kī chāñdnī ko pakaḌne kī ḳhvāhish
kabhī sub.h ke hoñT chhūne kī hasrat

vo dekhtā rahā hasrat se āsmāñ kī taraf
chhupā huā vo parinda jo sā.ebān meñ thā

baḌī hasrat se insāñ bachpane ko yaad kartā hai
ye phal pak kar dobāra chāhtā hai ḳhaam ho jaa.e

qissa-e-tūr kabhī gosh-e-haqīqat se suno
shauq-e-dīdār ba-juz hasrat-e-dīdār na thā

kyā dil jigar kī kahiye tamannā-e-vasl meñ
hasrat bharā hai ek pur-armāñ hai dūsrā

na paar lagne kī hasrat na Duub jaane kā ġham
ḳhayāl-e-yār ke dariyā meñ jab utar jaa.eñ

miTā do hasrat-e-ābādī-e-dil bhī mire dil se
ye jitnā ab hai is se aur vīrāna to kyā hogā

ye zan-e-naġhma-gar-o-ishq-shi.ār
yās-o-hasrat se huī hai hairāñ

sadiyoñ navā-garoñ ko mayassar na aa mile
vo giit jin ko hasrat-e-sāzinda kah sakeñ

maiñ vasl meñ bhī 'sheftā' hasrat-talab rahā
gustāḳhiyoñ meñ bhī mujhe pās-e-adab rahā

tamkanat se tujhe ruḳhsat to kiyā hai lekin
ham se in āñkhoñ kī hasrat nahīñ dekhī jaatī

nikālā husn kā armān tū ne
mirī hasrat na ai dil-jū nikālī

us kī qismat meñ rasā.ī na sahī āshiq ko
hasrat-e-lazzat-e-iz.hār liye phirtī hai