Tags-Hawa

purze bhī uḌe haiñ mirī vahshat ke sar-e-rāh
nazroñ meñ hamārī ye tamāshā bhī huā hai

phūTe haiñ kahīñ aah bhare dil ke phaphole
pāmāl koī shahr-e-tamannā bhī huā hai

maanā ki kaḌī dhuup meñ saa.e bhī mile haiñ
is raah meñ har moḌ par dhokā bhī huā hai

raushan to hai yaḳh-basta fazāoñ meñ koī aag
tārīkī-e-zindāñ meñ ujālā bhī huā hai

har lamha koī hādisa roke hai mire paañv
har pal kisī ḳhvāhish kā taqāzā bhī huā hai

kis moḌ pe aa pahuñchā hai 'shāhid' ye zamāna
raftār qayāmat kī hai Thahrā bhī huā hai

charāġh-e-ishq badan se lagā thā kuchh aisā
maiñ bujh ke rah gayā us ko havā banāne meñ

umr-bhar thaam ke us shoḳh kā dāman ro.e
'soz' kyā us pe huā us kā asar yaad nahīñ

jaao ab jaao ki vo ahd-e-vafā ḳhatm huā
jab bhī dekho ki phir imkāñ hai qarīb aa jaao

bas ek zaḳhm thā dil meñ jagah banātā huā
hazār ġham the magar bhūlte-bisarte hue

vahī huā ki takalluf kā husn biich meñ thā
badan the qurb-e-tahī-lams se bikharte hue

mire baaġh meñ vo gulāb thā ki mahak rahā thā chaman chaman
vo jo gum huā to bikhar ga.e sabhī rañg huzn-o-malāl ke

dard gar behad huā to hausle baḌh jā.eñge
tum zaḳhm kuredoge ham aur nikhar jā.eñge

ab ghar ke darīche meñ aa.egī havā kaise
aage bhī plāzā hai pīchhe bhī plāzā hai

dil huā hai taraf mohabbat kā
ḳhuun ke qatre kā jigar dekho

huā hai ahl-e-sāhil par asar kyā
tujhe ai Dūbne vaale ḳhabar kyā

jaan dene ko na un par koī tayyār huā
goyā jāñ-bāz zamāne meñ na thā mere ba.ad

huā achchhā ki vo ghar se na nikle
kise mālūm kis ke dil meñ kyā thā

bahut achchhā huā vo le ga.e dil
baḌā ziddī nihāyat bevafā thā

hai shor-e-fuġhāñ ḳhāmushī-e-marg ke pīchhe
ik tez havā hai ḳhas-o-ḳhāshāk se aage