Tags-Hawa

tamām shahr kī āñkhoñ kā māhtāb huā
maiñ jab se us kī nigāhoñ meñ intiḳhāb huā

havā ke kāñdhoñ ne pahuñchāyā āsmānoñ tak
maiñ barg-e-sabz thā sūkhā to āftāb huā

palaT ke dekhūñ to mujh ko sazā.eñ detā hai
ajab sitāra rah-e-ġham meñ ham-rikāb huā

yuuñ qaus-e-chashm meñ aayā vo bārishoñ kī tarah
ki harf-e-dīd ka.ī rañgoñ kī kitāb huā

pighal ke aa ga.ī saarī udāsī lafzoñ meñ
vufūr-e-ġham mire ā.īne meñ habāb huā

maiñ apnī ḳhvāhisheñ gum kar ke mil gayā us ko
ḳhushā vo merī mohabbat meñ kāmyāb huā

aisā huā huuñ hijr meñ us ke nahīf-o-zār
dekhe agar mujhe vahīñ sharmā.e lucknow

ik yaad kā āñchal jo uḌā tez havā meñ
dene lagī hamdard bulāvā koī aahaT

kahtī hai ye shaam kī narm havā phir mahkegī is ghar kī fazā
nayā kamra sajā na.ī sham.a jalā tire chāhne vaale aur bhī haiñ

karb ke zahr kā maarā huā insān hai ye
sar pe sau bojh magar ḳhanda-ba-lab bhī hogā

ye jo Thahrā huā manzar hai badaltā hī nahīñ
vāqi.a parda-e-sā.at se nikaltā hī nahīñ

sab qaid huā jaatā hai tañgnā.e-ġhazal meñ
manzar pas-e-manzar hai badalne kī tarah kā

peḌ paude girā diye jis ne
us havā meñ charāġh rakkhā hai

us ko bhī sakta huā dekh ā.īna
der tak hairat se muñh dekhā kiyā

tirā lutf ātish-e-shauq ko had-e-zindagī se baḌhā na de
kahīñ bujh na jaa.e charāġh hī use dekh itnī havā na de

jab mahr numāyāñ huā sab chhup ga.e taare
tū mujh ko bharī bazm meñ tanhā nazar aayā

sabz mausam kī ināyat kā bharosā bhī nahīñ
kab uḌā de ye havā jaan ke pattā mujh ko

gesū ruḳh par havā se hilte haiñ
chaliye ab donoñ vaqt milte haiñ

vo tund vaqt kī rau hai ki paañv Tik na sakeñ
har aadmī koī ukhḌā huā shajar sā lage

aap kā chehra kho gayā hai kahāñ
dhuñdhlā dhuñdhlā huā hai merā jahāñ