Tags-Hawa

ik nazar roz kahīñ jaal bichhā.e rakhtī
aur ham roz giraftār huā karte the

ham ko ma.alūm thā aanā to nahīñ tujh ko magar
tere aane ke to āsār huā karte the

ishq karte the faqat pās-e-vafā rakhne ko
log sach-much ke vafādār huā karte the

ā.īna ḳhud bhī sañvartā thā hamārī ḳhātir
ham tire vāste tayyār huā karte the

ham gul-e-ḳhvāb sajāte the dukān-e-dil meñ
aur phir ḳhud hī ḳharīdār huā karte the

kūcha-e-'mīr' kī jānib nikal aate the sabhī
vo jo 'ġhālib' ke taraf-dār huā karte the

jin se āvārgī-e-shab kā bharam thā vo log
is bhare shahr meñ do-chār huā karte the

ye jo zindāñ meñ tumheñ saa.e nazar aate haiñ
ye kabhī raunaq-e-darbār huā karte the

maiñ sar-e-dasht-e-vafā ab huuñ akelā varna
mere ham-rāh mire yaar huā karte the

vaqt ruk ruk ke jinheñ dekhtā rahtā hai 'salīm'
ye kabhī vaqt kī raftār huā karte the

tum jo chāho to mujhe peḌ kā hissa kar do
varna pairoñ tale rauñdā huā pattā huuñ maiñ

chand lamhoñ kā dhuāñ aks meñ tabdīl huā
aur maiñ jhuum ke kahne lagā dekhā huuñ maiñ

khiḌkī hī meñ ThiThur ga.ī
kaalī aur chaukor havā

'ādil' ab shādī kar lo
sattā.īsvāñ ḳhatm huā

thoḌā thoḌā ye jo suhāgan rañg ikaTThā dil meñ huā hai
jaane kitne bhed nichoḌe niiñd gañvā.ī pyaas churā.ī

anfās se aatī huī ik narm sī ḳhushbū
simTā huā hoñToñ meñ mudārāt kā aalam

kyā chale kūcha-e-jānāñ kī havā mere saath
roz aa lagtā hai ik dasht nayā mere saath

kahīñ mushtāq se hijāb huā
kahīñ parda uThā diyā tū ne

vo sarāpā tirā vo tire ḳhāl-o-ḳhad merī yādoñ meñ sab muntashir ho ga.e
lafz kī justujū meñ laraztā huā nīm-vā sā faqat ik dahan rah gayā

tū sitāroñ ko apnī jilau meñ liye jā rahā thā tujhe kyā ḳhabar kyā huā
ik tamannā darīche meñ baiThī rahī ek bistar kahīñ be-shikan rah gayā