Tags-Hawa

sabā tasadduq tire nafas par chaman tire pairahan pe qurbāñ
nasīm-e-doshīzgī meñ kaisā basā huā hai shabāb terā

hazār shāḳheñ adā se lachkīñ huā na terā sā loch paidā
shafaq ne kitne hī rañg badle milā na rañg-e-shabāb terā

bhalā huā 'josh' ne haTāyā nigāh kā chashm-e-tar se parda
balā se jaatī raheñ gar āñkheñ khulā to band-e-naqāb terā

bahut uḌegā yahāñ par fasurdagī kā ġhubār
ki phir se chalne lagī hai havā udāsī kī

pairahan uḌ jā.egā rañg-e-qabā rah jā.egā
phuul ke tan par faqat aks-e-havā rah jā.egā

faizān-e-mohabbat na huā aam abhī tak
tārīk hai insān kā anjām abhī tak

ruḳhsat huā go daur-e-ḳhizāñ fasl-e-gul aa.ī
gulshan ke vahī haiñ sahar-o-shām abhī tak

duur tak phailā huā paanī hī paanī har taraf
ab ke bādal ne bahut kī mehrbānī har taraf

aag ke chappū havā ke bādbāñ miTTī kī naav
aur tā-hadd-e-nazar paanī hī paanī har taraf

mulk-e-suḳhan har ahl-e-suḳhan ko huā nasīb
'nātiq' mire nasīb meñ ye nāgpur thā

havā ne ahl-e-sahrā ko ajab malbūs baḳhshā hai
saroñ par log pagḌī ke bajā.e gard rakhte haiñ

pareshāñ bhī karegī gul khilā ke
tamāshe dekhte rahnā havā ke

vo jis ne shaam ke māthe pe haath pherā hai
ham us charāġh-e-havā-sāz kā adab bhī kareñ

to tai huā nā ki jab bhī likhnā rutoñ ke saare azaab likhnā
ujaaḌ mausam maiñ tapte sahrā ko aab likhnā habāb likhnā

havā ke māthe pa darj tahrīr mausamoñ kī tamāzatoñ se
jo miT ga.ī hai to kyā huā hai na.e sire se ye baab likhnā

badle meñ jafāoñ ke vafā kyuuñ nahīñ dete
tum ishq ke sho.aloñ ko havā kyuuñ nahīñ dete

vo merā ho ke bhī zāhir nahīñ huā mujh par
ye iḳhtilāf rahā us se umr bhar merā

zinda rakhtā thā mujhe shakl dikhā kar apnī
kahīñ rū-posh huā aur mujhe maar diyā

ye us ke qurb kī pādāsh meñ 'suḳhan' ham ko
nasīb hijr huā hai azaab kī sūrat

silsila jumbāñ ik tanhā se ruuh kisī tanhā kī thī
ek āvāz abhī aa.ī thī vo āvāz havā kī thī