Tags-Hawa

vasf us ke hasan kā kullī huā kis se gar
jis ke jitnā fahm meñ aayā kahā achchhā kahā

is tarah qaht-e-havā kī zad meñ hai merā vajūd
āñdhiyāñ pahchān letī haiñ ba-āsānī mujhe

maiñ salīb-e-vaqt pe kab se huuñ mujhe ab to is se utaar lo
ki sazā bhī kaaT chukā huuñ maiñ mirā faisla bhī huā nahīñ

mahv-e-hairat huuñ ḳharāsh-e-dast-e-ġham ko dekh kar
zaḳhm chehre par haiñ yā hai ā.īna TuuTā huā

bhar kar dam-e-naz.a ik dam-e-sard
jannat kī havā meñ so ga.e ham

havā chalī to hare patte suukh kar TuuTe
jo sub.h aa.ī to hīrā-numā.iyāñ bhī ga.iiñ

kyā huā hai ki rifāqat kā bharam rakhne ko
mujh se mahbūb mirā zaḳhm nayā māñge hai

vo havā de rahe haiñ dāman kī
haa.e kis vaqt niiñd aa.ī hai

maiñ raste meñ jahāñ Thahrā huā thā
vahīñ to dhuup kā chehra khilā thā

vo kis ke jism kī ḳhushbū thī āḳhir
havā se tazkira kis kā sunā thā

sar uThāyā maz.habī dīvār par paTkā huā
raah par aane lagā dil raah se bhaTkā huā

ras-kashī kī dāvateñ dete rahe taaza gulāb
jhāḌiyoñ meñ thā magar titlī kā par aTkā huā

tazkira hone lagā jab āstīñ ke saañp kā
paas hī ehsās mujh ko sarsarāhaT kā huā

tishna-e-dīdār meñ hī to nahīñ huuñ in dinoñ
us ke ghar ke aa.ine kā bhī hai muñh laTkā huā

ajnabī māhaul meñ kho jaane kā Dar hai to kyā
thaam luuñ dāman tirā meñ bārhā jhaTkā huā

phir sar-e-sub.h kisī dard ke dar vā karne
dhaan ke khet se ik mauj-e-havā aa.ī hai