Tags-Hawa

mirī ḳhatāoñ pe ye bāz-purs mālik-e-hashr
atā huā thā kabhī dil pe iḳhtiyār mujhe

dekhā jo us sanam ko to mahsūs ye huā
jalva ḳhudā kā sūrat-e-insān ho gayā

yāroñ kī mohabbat kā yaqīñ kar liyā maiñ ne
phūloñ meñ chhupāyā huā ḳhanjar nahīñ dekhā

huī ḳhatm ġham kī āñdhī vahī dil kī lau hai ab bhī
yahī sho.ala thā vo sho.ala ki laḌā kiyā havā se

ye hai qasr-e-zindagānī ki habāb-e-bahr-e-fānī
abhī ban gayā havā se abhī miT gayā havā se

mirī laakh minnatoñ par tirī ik hayā hai bhārī
koī parda hai vo parda ki hile-Dule havā se

zamīñ pe khultī rahī haiñ kaliyāñ falak pe taare ugā kiye haiñ
yahī karishme huā kareñge yahī karishme huā kiye haiñ

ka.ī din ba.ad us ne guftugū kī
ka.ī din ba.ad phir achchhā huā maiñ

maiñ kisī jism pe pheñkā huā patthar to na thā
bār-hā apnā lahū dekh ke sharmātā huuñ

mizāj-e-sher ko har daur meñ rahā mahbūb
khanaktā lahja sulagtā huā nayā uslūb

charāġh qaum kā raushan hai arsh par dil ke
use havā ke farishte bujhā nahīñ sakte

bahut dinoñ meñ huā ahl-e-ārzū ko mayassar
vo qurb-e-ḳhās jahāñ terī yaad be-adabī hai

bedārī meñ soyā huā qatre meñ talātum
aur ḳhvāb meñ jaagā huā sailāb hai siina

ḳharābī kā āġhāz
kab aur kahāñ se huā

raat aisī ki kabhī jis kā saverā na huā
dard aisā ki koī jis kā masīhā na huā

raaz ik dil meñ liye phirte haiñ sahrā sahrā
koī hamrāz to ho shahr meñ aisā na huā

mere ehsās kī qismat meñ hī mahrūmī thī
kabhī sochā na huā aur kabhī chāhā na huā

dil ke ā.īne meñ har aks hai dhuñdlā dhuñdlā
laakh sūrat hai magar koī bhī tum sā na huā

bazm-e-aġhyār meñ 'shāhid' ke uḌe the purze
koī charchā na huā koī tamāshā na huā

dhaar talvār kī thī jāda-e-bārīk na thā
hai huā hashr kā maidān baḌī mushkil se