Tags-Hijr

na āñsuoñ hī meñ vo chamak thī na dil kī dhaḌkan meñ vo kasak thī
sahar ke hote hī nashsha-e-hijr-e-yār utrā to maiñ ne dekhā

ham musāfir haiñ gard-e-safar haiñ magar ai shab-e-hijr ham koī bachche nahīñ
jo abhī āñ.suoñ meñ nahā kar ga.e aur abhī muskurāte palaT ā.eñge

jugnuoñ se saath chalne kī guzārish kījiye
hijr kā lambā safar hai raat hai tanhā.ī hai

yaar ke ruḳh kī sabāhat kā tasavvur shab-e-hijr
aayā taskīñ ko mirī nuur kā taḌkā ho kar

hijr meñ yād-e-mizha aur bhī taḌpātī hai
qalb-e-bismil meñ khaTaktī hai ye kāñTā ho kar

jhuT-puTā vaqt huā maut kā sāmāñ shab-e-vasl
sahar-e-hijr kā murdoñ ne kafan dikhlāyā

kaash ik baar kabhī niind se uTh kar tum bhī
hijr kī rātoñ meñ ye dekho to kyā hotā hai

aa.ī hogī kisī ko hijr meñ maut
mujh ko to niiñd bhī nahīñ aatī

arsa-e-hijr se phir vasl kī sarshārī tak
hausla dil ko bahut chāhiye paspā.ī kā

vo hijr meñ visāl kī ummīd kyā huī
vo rañj meñ ḳhushī ke bahāne kidhar ga.e

tere hone pe bhī ik Dar sā lagā rahtā hai
kaise is jī se tire hijr kā dhaḌkā nikle

dast-bar-dil ho uThātā huuñ ajab lazzat-e-dard
yaad kar hijr meñ vo haath baḌhāne kā mazā

āḳhir-e-shab kī ḳhamoshī se yahī mujh pe khulā
hijr meñ sāmnā vahshat se kiyā jaatā hai

lamha-e-hijr apnī vus.at meñ, aap lazzat hai, zindagī bhar kī
tum bhī 'ḳhālid-moīn' yuuñ karnā, umr sarf-e-visāl mat karnā

ḳhizāñ meñ patte bhī aise kahāñ jhaḌe hoñge
hamārī āñkhoñ se juuñ hijr meñ jhaḌe aañsū

kabhī qatār se bāhar kabhī qatār ke biich
maiñ hijr-zād huā ḳharch intizār ke biich

taare ginvātī haiñ phir hijr kī kaalī rāteñ
jab mujhe yaad koī zohra-jamāl aatā hai

kis hijr se guzrā huuñ ki be-sāḳhta 'mohsin'
lailā-e-tamannā se baġhal-gīr huā maiñ

'jaun' karoge kab talak apnā misāliya talāsh
ab ka.ī hijr ho chuke ab ka.ī saal ho ga.e

hijr thā bār-e-amānat kī tarah
so ye ġham āḳhirī hichkī se uThā