Tags-Hijr

hai be-ḳhud vasl meñ dil hijr meñ muztar sivā hogā
ḳhushī jis ghar kī aisī hai vahāñ kā rañj kyā hogā

hijr kā chāñd dard kī naddī
yahī sūrat hai apnī duniyā kī

gar jalāne meñ jigar kā ḳhuuñ hai lutf-e-intizār
hijr kī lazzat bhī mar mar ke jiye jaane meñ hai

dil o dimāġh se ghāyal haiñ tere hijr-nasīb
shikasta dar bhī haiñ un kī chhateñ bhī Thiik nahīñ

hijr meñ itnā ḳhasāra to nahīñ ho saktā
ek hī ishq dobāra to nahīñ ho saktā

yād-e-gesū ne hijr kī shab
uljhā uljhā ke maar Daalā

ba.ad-e-shab-e-visāl na dekhūñ maiñ dāġh-e-hijr
yā-rab charāġh-e-umr bujhā de havā-e-sub.h

abhī tak aañkh ke har zāviye meñ hijr ke ġham haiñ
tumhāre ḳhvāb aate haiñ magar meñ so nahīñ saktī

tilmilātī raheñ hijr kī kulfateñ jām-o-mīnā kī sar-mastiyāñ kyā huiiñ
ab ye mai bhī ġhamoñ kā mudāvā nahīñ ab koī aur sāmāñ karo dosto

jo ahl-e-hijr meñ hotī hai ek diid kī rasm
tirī talāsh meñ vo rasm bhī uThā dūñgā

zarra kar mahr tū 'uzlat' pe ki mānind-e-hilāl
ḳhālī huuñ aap se din hijr ke phirte phirte

sho.ala-e-ishq ġham-e-hijr sar-e-shahr-e-hujūm
ik garebān thā sad-chāk se aage tak thā

sau rāteñ ek hijr kī shab meñ tamām kiiñ
jab aañkh band kī nazar aa.ī sahar mujhe

tilism hai ki tamāshā hai kā.enāt us kī
charāġh-e-hijr se raushan rahegī raat us kī

shab-e-hijr ne havas aur ishq ke saare farq miTā diye
koī chārpā.ī chaTaḳh ga.ī to kisī meñ baan nahīñ rahā

hotī hī nahīñ sub.h-e-qayāmat bhī numūdār
jāgeñge shab-e-hijr ke bīmār kahāñ tak

shaukat-e-majlis-e-hijrāñ ko baḌhānā thā so yaar
maiñ ne palkoñ pe tirā hijr sajāyā huā hai

phir hijr kī lambī raat miyāñ sanjog kī to yahī ek ghaḌī
jo dil meñ hai lab par aane do sharmānā kyā ghabrānā kyā

lo aao suno ham se ġham-e-hijr kī hālat
guzrī hai jo ham par vo chhupāne ke nahīñ ham

shikan bistar ke kahte haiñ marīz-e-hijr ko hamdam
taḌapne kī thakan se niiñd āḳhir aa ga.ī hogī