Tags-Hijr

hijr ke ba.ad ye socho ki kahāñ jāoge
ham to mar jā.eñge vaise bhī hamārā kyā hai

vahī bai.at-e-ġham-e-hijr thī vahī kashf-e-hujra-e-vasl thā
maiñ murīd-e-halqa-e-ḳhvāb thā so qarīn-e-murshid-e-lab rahā

sā.at-e-hijr jab satātī hai
vaqt kī nabz ruk sī jaatī hai

kab tak us kā hijr manātā sahrā chhoḌ diyā
jiine kī ummīd meñ maiñ ne kyā kyā chhoḌ diyā

kahāñ vo vasl kī rāteñ kahāñ ye hijr ke din
ḳhayāl-e-gardish-e-lail-o-nahār hotā hai

havā ke sāyoñ meñ hijr aur hijratoñ ke vo ḳhvāb
maiñ apne dil meñ vo sab manzileñ sajā rakhtā

kaḌe haiñ hijr ke lamhāt us se kah denā
bikhar rahī hai mirī zaat us se kah denā

mujhe zāfrān se zard-tar ġham-e-hijr-e-yār ne kar diyā
nahīñ aisā koī zamāne meñ mire haal par jo hañsā nahīñ

ye hijr bhī savāb se kam to nahīñ 'naved'
maiñ is ke vāste vo kamā.e mire liye

hijr ke tapte mausam meñ bhī dil un se vābasta hai
ab tak yaad kā pattā pattā Daalī se paivasta hai

ye hijr-e-musalsal rahā ā.īn-e-mohabbat
is dard kī talḳhī se pareshāñ na huā kar

hijr kā mausam le kar sūraj niklā hai
barf lipaT kar rotī hai kohsār ke saath

jo raat basar kī thī mire hijr meñ tū ne
us raat bahut der tire saath rahā maiñ

hijr kaisā visāl ho bil-farz
kuchh hī sūrat ho mushkilāt hai ab

hijr kī pahlī shaam ho yā ho vasl kā din
jitne manzar-nāme haiñ sab ḳhūnīñ haiñ

magar ek najm-e-sahar-numā kahīñ jāgtā
tire hijr kī shab-e-tār meñ use dekhte

vasl kī shab bhale hī kaalī ho
hijr meñ raushnī na kar lenā

hijr-o-visāl-e-yār kā mausam nikal gayā
ai dard-e-ishq jaag zamāna badal gayā

qarīb-e-sub.h ye kah kar ajal ne aañkh jhapkā dī
are o hijr ke maare tujhe ab tak na ḳhvāb aayā

zarā mausam badaltā aur phir to
hamāre hijr meñ namnāk hotā