Tags-Hijr

kaisā Dar ashkoñ kī naql-e-makānī par
hijr kā pahra hai āñkhoñ ke paanī par

ye kis tarah kī mohabbat thī kaisā rishta thā
ki hijr ne na rulāyā use na taḌpā maiñ

tum apnī yaad se kah do na jaa.e chhoḌ ke dil
ki dard-e-hijr na rakh de kahīñ maroḌ ke dil

hijr kahte haiñ kise ye kyā kisī se pūchhnā
pūchhnā paḌ jaa.e bhī to bāñsurī se pūchhnā

kabhī to miltī thī hijr-o-visāl meñ lazzat
magar bujhī huī dil meñ vo soz-o-sāz kahāñ

ātish-e-hijr meñ dil sulagtā rahā
ruḳh pe kitne hī dariyā ravāñ mil ga.e

shikva-e-hijr na bhūle se bhī aayā lab par
rū-ba-rū un ke maiñ ḳhud-karda pashemāñ na huā

hijr kā din kyuuñ chaḌhne paa.e
vasl kī shab tūlānī kar do

tere bīmār-e-hijr ai mahbūb
na to motī meñ haiñ na ahyā meñ

kabhī ham ḳhirad se the āshnā hue ab haiñ ahal-e-junūñ-nashīñ
is hālat-e-ġham-e-hijr meñ koī aa ke ham ko uThā na de

na vo visāl ke qisse na hijr kā ronā
baḌā ajiib sā kuchh din se haal hai apnā

bāñTā hai mujhe hijr ne TukḌoñ meñ ki merī
āñkheñ haiñ kahīñ par to kahīñ ḳhvāb mileñge

ghol de hijr ke rañgoñ meñ kuchh dil kā lahū
koī naqsh to us kī yaad kā zinda kar

yaañ tak rahe judā ki hamāre mazāq meñ
āḳhir ki zahr-e-hijr bhī tiryāk ho gayā

kab talak hijr kī agan meñ jalūñ
aa bujhāne kā vaqt aayā hai

dāġh-hā-e-hijr meñ bhī dil meñ haiñ ḳhār-e-shauq bhī
baaġh kā baaġh aur ye sahrā kā sahrā ho gayā

ai ġham mujhe tamām shab-e-hijr meñ na khā
rahne de kuchh ki sub.h kā bhī nāshtā chale

hijr baa.is hai bad-gumānī kā
ġhairat-e-ishq hai to kab kal hai

maiñ ḳhālī vaqt meñ TuuTe sitāre joḌtā thā
tumhārā hijr aisā rā.egāñ hotā nahīñ thā

kyā chhoḌ ke bastī ko gayā tū ki tire ba.ad
phir ghar se tire hijr ke maare nahīñ nikle