Tags-Hunar

maanā mushkil hai magar ab ye hunar sīkheñge
kyā ḳhabar thī ki paḌegā hameñ āsāñ honā

sarsabz merī shāḳh-e-hunar kyuuñ nahīñ huī
ye mas.ala hai tere tamannā.ī ke liye

ishq meñ ḳhair thā junūñ lāzim
ab koī dūsrā hunar bhī karūñ

ye tamannā nahīñ ab dād-e-hunar de koī
aa ke mujh ko mire hone kī ḳhabar de koī

ho jahāñ aib-shumārī hī parakh kā mafhūm
sābir us shahr meñ kyā dād-e-hunar māñge hai

shart salīqa hai har ik amr meñ
aib bhī karne ko hunar chāhiye

kyā aur na thā koī jo un ko samajh paatā
bāzār-e-jihālat meñ kyuuñ ahl-e-hunar aa.e

tālīm-o-hunar hī vo ḳhazāna hai jo ab tak
daulat ke luTeroñ se luTā hai na luTegā

kyuuñ hāshiye par aaj bhī rakhtī hai kahānī
kirdār nibhāne kā hunar pā to ga.e ham

sunā hai shauq thā un ko hunar aatā nahīñ thā
sunahre zehn kī vāraftagī ko dekhne kā

hunar kī baat jo pūchho to muḳhtasar ye hai
kashīd karte haiñ aag aur dhuāñ banāte haiñ

dast-e-hunar pe nok-e-sināñ par ġhurūr hai
lekin jarī jo nok-e-sināñ kaaT dī ga.ī

jo dekhtā huuñ zamāne kī nā-shanāsī ko
ye sochtā huuñ ki achchhā thā be-hunar rahtā

jo haiñ be-amal vo haiñ bā-amal jo haiñ be-hunar vo haiñ bā-hunar
ajab inqilāb-e-zamāna hai kahīñ qadr-e-ahl-e-hunar nahīñ

jā.ūñ kahāñ shu.ūr-e-hunar kis ke paas hai
āñkheñ haiñ sab ke paas nazar kis ke paas hai

hunar jo ḳhvāb churāne kā maiñ ne sīkhā hai
yahāñ pe kitnoñ kī nīndeñ uḌaa.e baiThā huuñ

dil jal rahā thā ġham se magar naġhma-gar rahā
jab tak rahā maiñ saath mire ye hunar rahā

ye naf.a-ḳhoroñ kī dānish-farosh duniyā hai
matā-e-ilm kī jins-e-hunar kī ḳhair manāo

sāmnā zindagī se karne kā
har kisī meñ hunar nahīñ hotā

hameñ to saath chalne kā hunar ab tak nahīñ aayā
diyā apne muqaddar kā nazar ab tak nahīñ aayā