Tags-Hunar

ye arsa-gāh-e-talab qurbatoñ kī duniyā hai
yahāñ ham aisā koī be-hunar nahīñ aatā

lafz ko ilhām ma.anī ko sharar samjhā thā maiñ
dar-haqīqat aib thā jis ko hunar samjhā thā maiñ

qadrdānī kī kaifiyat mālūm
aib kyā hai agar hunar na huā

dayā āshiq ne jī to aib kyā hai
yahī 'mīr' ik hunar hotā hai ham meñ

mujh ko qadroñ ke badalne se ye hogā fā.eda
mere jitne aib haiñ saare hunar ho jā.eñge

har zamāne meñ ḳhushāmad ne sadārat kī hai
kāmrāñ hotā rahā hai ye hunar sadiyoñ se

nashv-o-numā paa.ī hai deccan meñ qadr hamārī kyūñkar hogī
ghar kī murġhī daal barābar kis ko dikhā.eñ apnā hunar ham

ilm-o-hunar ko kaam meñ laao mustaqbil kī fikr karo
haal meñ maazī kī bhūloñ par pachhtāne se kyā hogā

vaj.h-e-rusvā.ī hai yahāñ har baat
aib meñ kyā hai jo hunar meñ nahīñ

yahī nahīñ ki faqat rizq-e-ḳhvāb band huā
gadā-e-kū-e-hunar bhī sagāñ kī zad meñ hai

raushnī ke liye darkār hai be-tābī-e-ḳhāk
chāñd lekin hunar-e-shab se ibārat bhī rahe

ġhazal sunā.ūñ to daad pā.ūñ magar maiñ tum se bhī kyā chhupā.ūñ
tumhī ne saare hunar sikhā.e tumhī se rañg-e-'hilāl' aayā

uñgliyāñ jism ke sab aib-o-hunar jāntī haiñ
lams jaage to ik ik baat samajh meñ aa.e

kal us ne chheḌ ke mahfil meñ tazkira merā
har ek aib-o-hunar ko sarīh kar Daalā

ai rabb-e-hunar chashm-e-ināyāt idhar bhī
har-chand ki ham tere gunahgār bahut haiñ

vo mirī ḳhush-fahmiyāñ sab kyā huiiñ
jaane kab se be-hunar zinda huuñ maiñ

mulamma.a vaqt kā chaḌhtā gayā kyuuñ is qadar bolo
ki patthar ko hañsā kar bā-hunar bhī ho ga.e patthar

aap is Dhañg se amrit bhī nahīñ pī sakte
jis hunar-mandī se ham ashk-e-nafas piite haiñ

ye maiñ apne aib jo kar rahā huuñ ayaañ 'zafar'
to dar-asl ye bhī koī hunar nahīñ kar rahā

thā dast-e-hunar meñ mom sā jo
pathrā gayā vo shabāb kaisā