Tags-Hunar

vo daur aayā sadā zulm-o-sitam ke bhī ḳhilāf uTThī
hamārī aur tirī duniyā ke arbāb-e-hunar jaage

baḳhiya-gar chāk-e-garebāñ kī ho tadbīr koī
huuñ tirī dast-nigar apnā hunar hone tak

'qā.em' maiñ reḳhta ko diyā ḳhil.at-e-qubūl
varna ye pesh-e-ahl-e-hunar kyā kamāl thā

vo be-sutūñ bhī mirī zaat jū-e-shīr bhī maiñ
mujhe ujaaḌ gayā tesha-e-hunar merā

mutrib jo hunar-mand ho dam-sāz ho phir dekh
har saaz meñ mastūr haiñ har saaz kī bāteñ

jis ko chāheñ ye use apnā banā saktī haiñ
terī ā.ankhoñ ke samundar meñ hunar jāgtā hai

raftār par itnī daad na do manzil na mirī chhīno mujh se
az-rāh-e-hunar mire hisse kī thoḌī nākāmī rahne do

sajāyā ḳhud ko vafā ke siñghār se maiñ ne
isī sabab se kabhī be-hunar nahīñ huī maiñ

charāġh-e-josh havā-e-balāġh ne phūñkā
na jaane umr ke saath aur kyā hunar jaa.eñ

ġhazab se chīñ-bar-jabīñ dikhā.e badan se Tapke bhī hai pasīna
ayaañ hai yaaro na.e hunar se falak pe bijlī zamīñ pe bārāñ

nahā ke afshāñ chuno jabīñ par nichoḌo bāloñ ko ba.ad is ke
dikhāo āshiq ko is hunar se falak pe bijlī zamīñ pe bārāñ

sachchā.ī kī ḳhushbū kī ramaq tak na thī un meñ
vo log jo bāzār-e-hunar khole hue the

hunar to roz hī biktā hai chand sikkoñ meñ
ḳharīd le na zamāna tumheñ amaañ dekho

ik diyā ho jis meñ ilm-o-dīñ hunar kā tel ho
ho charāġh aisā to phir ghar ghar meñ jalnā chāhiye

ba-juz kār-e-hunar maiñ kar bhī kyā saktā huuñ 'najmī'
yahī kartā rahā huuñ aur yahī kartā rahūñgā

āzād kar 'najīb' giraftār-e-ramz ko
rañgoñ meñ khol ai mire rañg-e-hunar mujhe

maiñ ne jinheñ chhuā unheñ shahkār kar diyā
ai kaash chhū sake mirā dast-e-hunar mujhe

intizār aur dastakoñ ke darmiyāñ kaTtī hai umr
itnī āsānī se to bāb-e-hunar khultā nahīñ

use āzār apnānā bahut achchhā lagā kartā thā
usī ne dard siine meñ basāne ke hunar se naam paayā thā

zamīr bechnā āsāñ sahī magar yaaro
ḳhatā muaaf hameñ ye hunar nahīñ aayā