Tags-Aasraa

uf-rī māyūsī kisī kā aasrā rakhtī nahīñ
shubah hotā hai ki tū shāyad ḳhudā rakhtī nahīñ

ab to nahīñ aasrā kisī kā
allāh hai apnī bekasī kā

chale to haiñ kisī aahaT kā aasrā le kar
bhaTak na jaa.eñ kahīñ ajnabī fazāoñ meñ

tū āsmān kī sūrat hai gar paḌegā kabhī
zamīñ huuñ maiñ bhī magar tujh ko aasrā dūñgā

shab-e-firāq vo halkī sī ik shuā-e-umīd
vo sub.h tak mire jiine kā aasrā honā

azal se us kā hī aasrā hai jo dene vaalā murādoñ kā hai
barā.e-fil-faur umīd-e-dil ko jo chūmne us ke dar ko chaliye

muqaddas ho gayā hai jhuuT merā
mujhe to ab usī kā aasrā hai

le de ke rah gayā hai yahī ek aasrā
aisā kabhī na ho ki vo tark-e-vafā kare

tañg mat kar ai zamīñ kar deñ ishāra ik agar
āsmānoñ se bhī ham ko aasrā mil jā.egā

vā dareġhā thā dil-e-bīmār-e-ġham ko aasrā
āb-e-teġh-e-nāz se ik din mujhe hogī shifā

merī himmat bhī hausla bhī gayā
zinda rahne kā aasrā bhī gayā

merī himmat the hausla the tum
zinda rahne kā aasrā the tum

kahte haiñ ek shaḳhs kī ḳhātir jiye to kyā
achchhā yūñhī sahī to koī aasrā na ho

jab ye samjhūñgā ki merī ziist hai mamnūn-e-marg
maut merī zindagī kā aasrā ho jā.egī

āgahī tū ne hameñ kin vus.atoñ meñ gum kiyā
be-nishāñ har mulk meñ be-āsrā har ghar meñ ham

kam se kam thā ik tarah kā aasrā iqrār tak
lekin un ko saaf ab inkār karnā aa gayā

dil ko kyā kyā sukūn hotā hai
jab koī aasrā nahīñ hotā

ahl-e-duniyā ḳhush hoñ yā nā-ḳhush hoñ kuchh parvā nahīñ
aasrā rakhtā hai ye banda ḳhudā kī zaat kā

kiyā hasrat se ruḳhsat sub.h ke tāroñ ko ye kah
ki jis kā shaam se thā aasrā ab tak nahīñ aayā

ummīd-e-vasl kī hālat na pūchho
faqat ik aasrā hī aasrā thā