Tags-Husn

vo husn ban ke gul kī tapish meñ samā gayā
hañs hañs ke jal gayā jo tire ġham kī aag meñ

'nazīr' apnā to ma.ashūq ḳhūbsūrat hai
jo husn us meñ hai aisā koī ajiib na ho

husn-e-jānāñ ishq kā jaadū raqs-o-mastī dard kī lai
is mahfil kī jaltī bujhtī saarī shāmeñ terī haiñ

jis meñ ik husn-e-tavāzun ho vo nudrat dī jaa.e
kyā qabāhat hai agar fikr ko vus.at dī jaa.e

husn rañgoñ ke tasādum se jilā paatā hai
jaise ik ḳhaal kisī rū-e-hasīñ par sāhab

kabhī bastiyāñ ban kabhī koh-o-daman rahā kitne dinoñ yahī jī kā chalan
jahāñ husn milā vahāñ baiTh rahe jahāñ pyaar milā vahāñ saad kiyā

ġhuncha hī phuul ban kar jān-e-chaman huā hai
maiñ ne yaqīñ kī daulat paa.ī hai husn-e-zan se

husn-e-nazar kā jaadū sar chaḌh ke boltā hai
asnām-e-marmarīñ bhī lagte haiñ sīm-tan se

husn ke baab meñ 'akbar' kī sanad kaafī hai
ham bhī har ik but-e-kamsin ko parī kahte haiñ

ḳhud ko is hosh meñ mad.hosh banāne ke liye
āyat-e-husn paḌhūñ dekhtā jā.ūñ tujh ko

is husn-e-zan pe ham-safaroñ ke huuñ pā-ba-gil
mujh be-ḳhabar ko rahbar-e-manzil banā diyā

jamāliyāt kā naqqād jitnā hairāñ hai
vo bāb-e-husn meñ bhī utnā hī pareshāñ hai

to jaise dhuup meñ chamaktā barf-posh kohsār
maiñ kaalī raat kā diyā tū mere husn sā nahīñ

yūsuf ke husn ne ye zuleḳhā ko dī sadā
lo uñgliyāñ kaTīñ vo hue ta.ana-zan ḳharāb

nāzuk diloñ kā husn hai rañg-e-shikastagī
phaTne se kab guloñ kā huā pairahan ḳharāb

aap ise husn-e-talab mat samjheñ nā kuchh aur shumār kareñ
sher ik 'mīr' faqīr kā ham jo aap ke gosh guzār kareñ

zaḳhmī huā hai naam ko dar-parda husn bhī
yūsuf kā ḳhūn-e-gurg se hai pairahan ḳharāb

ġham-e-ishq hī ko maiñ kyā kahūñ tire husn ko bhī nahīñ sukūñ
kabhī is nazar kī talāsh meñ kabhī us nazar kī talāsh meñ

hamīñ ne ishq ko husn-e-anā kā rañg diyā
hamīñ pe ishq meñ aa.iiñ burā.iyāñ kyā kyā