Tags-Husn

hai ab bhī rañg rañg-e-tamannā kā pairahan
ḳhvāboñ ke saath ab bhī vahī husn-e-zan sā hai

tārāj nasheman khel sahī sayyād magar itnā sun le
jab ishq kī duniyā luTtī hai ḳhud husn kā mātam hotā hai

anjām-e-vafā bhī dekh liyā ab kis liye sar ḳham hotā hai
nāzuk hai mizāj-e-husn bahut sajde se bhī barham hotā hai

tazkira dil kā baar baar na kar
husn ko husn-e-sharmsār na kar

fasl-e-gul rañg-e-chaman daur-e-ḳhizāñ husn-e-bahār
muḳhtalif naam haiñ saaqī tire paimānoñ ke

jalva us kā ai 'sāhir' chashm-e-pāk-bīñ se dekh
husn-e-lā-yāzlī se shash-jahāt haiñ ābād

mil-milā ke donoñ ne dil ko kar diyā barbād
husn ne kiyā be-ḳhud ishq ne kiyā āzād

vo jis ke husn kī tārīḳh tum ne ḳhud hī likkhī thī
vahī tasvīr kyuuñ duniyā ko dikhlāne nahīñ dete

husn ke gaare meñ āb-e-ishq kī chhīñTeñ milā
champa.ī rañgat meñ ātish sansanānī chāhiye

ham arz-e-hāl kar na sake uf-re ro.ab-e-husn
jaate hī un ke sāmne patthar ke ho ga.e

tum husn kī ḳhud ik duniyā ho shāyad ye tumheñ mālūm nahīñ
mahfil meñ tumhāre aane se har chiiz pe nuur aa jaatā hai

āsmānoñ par bhī haiñ charche husn-e-ālamgīr ke
chāñd ne bhī rañg uḌaa.e chāñd sī tasvīr ke

pūchhte haiñ ki kyā huā dil ko
husn vāloñ kī sādgī na ga.ī

kaT gayā āshiq sar-e-bāzār saudā bik gayā
jān-e-lailā ishq ne dil husn-e-ḳhūbāñ le chalā

husn jab maqtal kī jānib teġh-e-burrāñ le chalā
ishq apne mujrmoñ ko pā-ba-jaulāñ le chalā

ishq ke sahrā-nashīnoñ se mulāqāteñ bhī thiiñ
husn ke shahr-e-nigārāñ meñ bahut charchā bhī thā

pesh-e-nazar jahāñ ke rahī rahmat-e-ḳhudā
ham barhamī-e-husn-e-butāñ dekhte rahe

puurī tarah se haath meñ aayā nahīñ kabhī
vo husn-e-be-misāl bhī aadhā sarāb hai

vo jis kī diid meñ lākhoñ masarrateñ pinhāñ
vo husn jis kī tamannā meñ jannateñ pinhāñ

ishq le kar maiñ aa gayā 'maz.har'
husn terā dayār chāhtā huuñ