Tags-Husn

ye tamannā hai ki is tarah musalmāñ hotā
maiñ tire husn pe sau jaan se qurbāñ hotā

ḳhilqat-e-ḳhūbāñ ke biich qubah-e-ḳhudā nikle hai
aib hai use munkiro husn agar dekhnā

mirī nigāh kahāñ dīd-e-husn-e-yār kahāñ
ho e'tibār to phir tāb-e-intizār kahāñ

jam.a ḳhātir na huī dīd-e-butāñ se apnī
daftar-e-husn ko ajzā-e-pareshāñ samjhā

paas aa.e to asl husn khule
duur kī chiiz rāz-e-nā-ma.alūm

haiñ sau tarah ke rañg har ik naqsh-e-pā meñ dekh
insāñ kā husn ā.ina-e-irtiqā meñ dekh

ehsās-e-husn ban ke nazar meñ samā ga.e
go laakh duur the vo magar paas aa ga.e

dil-guzārī bhī liye hai imtiyāz-e-husn-o-ishq
ḳhuun ro detā huuñ maiñ aur ashk pī jaate ho tum

jītnā ishq kī baazī koī āsān nahīñ
ain mumkin hai koī husn gavāh tak pahuñche

nāzāñ na husn par ho mehmāñ hai chaar din kā
be-e'tibār aisī daulat nahīñ hai koī

jhuum kar phuul ruḳh-e-yār pe hote haiñ fidā
kaif-e-nazzārgī-e-husn se lahrā.e bahār

diida o dil meñ koī husn bikhartā hī rahā
laakh pardoñ meñ chhupā koī sañvartā hī rahā

sunā hai jab siiñ tere husn kā shor
liyā zāhid ne masjid kā kinārā

husn-e-bahār mujh ko mukammal nahīñ lagā
maiñ ne tarāsh lī hai ḳhizāñ apne haath se

ye nirālī terī ḳhilqat sham.a us par husn bhī
ham ne dekhī ek terī hī zabāñ bālā-e-sar

ham-safar kuchh din rahe lekin ḳhudā jaane ki ab
ishq hai kis marhale meñ husn kis manzil meñ hai

kārvān-e-husn-o-ishq ab tak kahīñ Thahrā nahīñ
qais abhī sahrā meñ hai lailā abhī mahmil meñ hai

tū ne dī jo dard kī daulateñ vo ġhazal ġhazal na samā sakīñ
mire haath se tire husn kī ye virāsateñ bhī chalī ga.iiñ

nisār-e-husn-e-mohabbat rahī hai dekhoge
kalī ke saath hī shāḳhoñ pe ḳhaar aa.egā

palak palak pe sitāre saje hue haiñ 'ziyā'
ye un kā husn-e-nazar hai ki raushnī merī