Tags-Husn

mere dil-e-ġhuyūr kā husn-e-talab to dekh
goyā zabāñ pe harf-e-tamannā girāñ na thā

na vo ḳhum meñ baade kā josh hai na vo husn jalva-farosh hai
na kisī ko raat kā hosh hai vo sahar ki shab kā gumāñ nahīñ

allāh allāh ye me.arāj-e-mohabbat ai 'shauq'
husn ab ishq kā paanī hī bharā kartā hai

maiñ us fareb-e-husn se ḳhud bā-ḳhabar na thā
vo thā to mere saath ba-zāhir magar na thā

husn kyuuñ ishq kī tash.hīr pe shādāñ hai bahut
ishq rusvā hai to kyā husn na rusvā hogā

mire mātam kī kyā jaldī hai kyuuñ zevar baḌhāte haiñ
abhī ārāsta vo husn kā bāzār rahne deñ

rañg-e-nazar se husn-e-tamannā nikhār ke
baiThī huuñ aaj kākul-e-hastī sañvār ke

ye kaisī jafā.eñ hotī haiñ ye kaisī adā hai un kī 'fanā'
ham husn kā parda rakhte haiñ vo ishq kā da.avā karte haiñ

sunā hai jab siiñ tere husn kā shor
liyā zāhid ne masjid kā kinārā

kuchh un kā husn bhī thā māvarā misāloñ se
kuchh apnā ishq bhī ham be-misāl rakhte the

faroġh-e-husn taġhayyur-pasand kuchh bhī nahīñ
ziyā-e-kirmak-e-shab-tāb kī hai koī numūd

uThī ghaTā kī tarah chhā ga.ī fazā kī tarah
hudūd-e-husn meñ tāsīr-e-ishq-e-nā-mahdūd

faroġh-e-husn meñ kyā be-sabāt dil kā vajūd
vo āftāb ye shabnam vo aag ye bārūd

hai ishq se husn kī safā.ī zāhir
rindī se huī hai pārsā.ī zāhir

nik.hat-o-nūr-o-ziyā husn kī pahchān bane
ishq mansūb huā bām-e-ḳharābāt ke saath

jahān-zād nīche galī meñ tire dar ke aage
ye maiñ soḳhtā-sar hasan-kūzā-gar huuñ!

kyā ḳhabar thī koī rusvā-e-jahāñ ho jā.egā
kuchh na kahnā bhī mirā husn-e-bayāñ ho jā.egā

gulzār hai bahār yūñhī husn-e-yār se
jaise chaman bahār se gulzār ho ga.e

ye husn-e-ḳhud-farosh ajab jins hai 'hasan'
vo bik ga.e jo us ke ḳharīdār ho ga.e

tumhārī zid hai 'āsim' vo nikhāre husn apnā
agar us ke liye tum ko sañvarnā paḌ gayā to