Tags-Husn

aa gayā vo shajar-e-husn nazar jab ham ko
bosa le kar lab-e-shīrīñ ke chuvāre toḌe

zaqan o ruḳh meñ na jāsūsoñ se baaqī rakkhī
samar-e-gul chaman-e-husn ke saare toḌe

jhagḌā to husn o ishq kā chuktā hai pal ke biich
gar mahkame meñ qaazī ke tū rū-ba-rū na ho

kaun hai shahsavār-e-tausan-e-husn
jis kā hai ye ġhubār ā.ankhoñ meñ

faiz-e-ḳhādim-safī se hai 'āsim'
jalva-gar husn-e-yār ā.ankhoñ meñ

kyā na sābit thī mirī ḳhush-hunarī
kyuuñ tirā husn-e-nazar yaad aayā

mujh meñ aa kar Thahar gayā koī
husn-e-dil meñ utar gayā koī

tirī vafā ne mohabbat ko e.atibār diyā
tirī nazar se mujhe husn-e-e.atibār milā

naqāb us ne ruḳh-e-husn-e-zar pe Daal diyā
ki jaise shab kā añdherā sahar pe Daal diyā

phir vahī raqs-e-sharār-e-zindagī
phir vahī husn-e-latāfat-rez kī tābindagī

atā kar mujhe vo maqām-e-mohabbat
kare husn ḳhud ishq kī pāsbānī

tāsīr-e-barq-e-husn jo un ke suḳhan meñ thī
ik larzish-e-ḳhafī mire saare badan meñ thī

'salīm' dasht-e-tamannā meñ kaun hai kis kā
yahāñ to ishq bhī tanhā hai husn bhī tanhā

ye kis ke husn se yādoñ kī ban ga.ī tasvīr
dil-ā.ine pe sunahrā ġhubār kis kā thā

kam-baḳht dil burā huā tirī aah aah kā
husn-e-nigāh bhī na rahā gaah gaah kā

ham bhī kar leñ namāz kī niyyat
husn vaale tirī imāmat ho

jalva-e-husn-e-butāñ se hai agar dil kā ziyāñ
ai ḳhudā-vand mire dil kā ziyāñ aur sahī

banā diyā use ḳhud-bīn o ḳhud-numā 'beḳhud'
huā hai ā.īna-e-husn-e-yār dil merā

un kī āñkhoñ se Dhal paḌe aañsū
māya-e-husn kī zakāt ga.ī

na vo ishq meñ rahīñ garmiyāñ na vo husn meñ rahīñ shoḳhiyāñ
na vo ġhaznavī meñ taḌap rahī na vo ḳham hai zulf-e-ayāz maiñ